By ភ្នំពេញ៖ សមត្ថកិច្ចកំពុងស្រាវជ្រាវរកបុរសខ្មែរម្នាក់ដែលប្រើកាយវិការ និងសម្ដីមិនសមរម្យទៅលើអ្នកទេសចរបរទេសនៅរបងវត្តឧណ្ណាលោម ដោយជននោះត្រូវបានកំណត់ថាជាជនអនាថាគ្មានទីលំនៅច្បាស់លាស់។
ហេតុការណ៍នេះបានកើតឡើងនៅថ្ងៃទី៩ ខែមេសា ឆ្នាំ២០២៦ នៅរបងវត្តឧណ្ណាលោម សង្កាត់ជ័យជំនះ ខណ្ឌដូនពេញ រាជធានីភ្នំពេញ។ លោកវរសេនីយ៍ឯក ទៀង ច័ន្ទសារ អធិការនគរបាលខណ្ឌដូនពេញ បានបញ្ជាក់ថា ក្រោយមានបទបញ្ជាពីលោកឧត្តមសេនីយ៍ឯក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ កម្លាំងនគរបាលបានចុះទៅទីតាំងកើតហេតុធ្វើការសួរនាំ។
លោកអធិការបានបញ្ជាក់បន្ថែមថា៖ “បុរសដែលប្រើកាយវិការ និងសម្ដីមិនសមរម្យទៅលើជនបរទេស គឺជាជនអនាថា គ្មានទីលំនៅច្បាស់លាស់ ដើរគ្រប់ទីកន្លែង និងដេកតាមទីសាធារណៈ។ កម្លាំងនគរបាលកំពុងបន្តស្រាវជ្រាវរកបុរសនោះមកសួរនាំ។”
លោក សួន គឹមសុង អ្នករត់ម៉ូតូកង់បីដែលជាសាក្សីកាលពីថ្ងៃកើតហេតុ បានបញ្ជាក់ថា៖ “កាលពីថ្ងៃកើតហេតុ មានសប្បុរសជនមកចែកអំណោយដល់លោកតា លោកអ៊ំធាក់ស៊ីក្លូ ហើយស្រាប់តែមានជនបរទេសដើរមកបានប៉ះពាក្យសម្ដីគ្នាដូចក្នុងវីដេអូលើបណ្តាញសង្គម។”
សមត្ថកិច្ចបន្តស្រាវជ្រាវរកបុរសខាងលើនោះមកសួរនាំ ដើម្បីអនុវត្តបន្តចំពោះមុខតាមច្បាប់។ ករណីនេះបានធ្វើឱ្យមានការព្រួយបារម្ភពីសាធារណជន និងអ្នកទេសចរដែលមកទស្សនាទីសក្ការៈបូជានៅក្នុងទីក្រុង។
