រុស្ស៊ីទាមទារការគោរពជាសកល ក្រោយអាមេរិកលើកលែងទណ្ឌកម្មប្រេង

រុស្ស៊ីបានធ្វើការទាមទារឲ្យមានការគោរពពីសហគមន៍អន្តរជាតិចំពោះតួនាទីរបស់ខ្លួនក្នុងទីផ្សារថាមពលសកល បន្ទាប់ពីសហរដ្ឋអាមេរិកបានលើកលែងទណ្ឌកម្មលើប្រេងរបស់មូស្គូម្តងទៀត។

អ្នកនាំពាក្យវិមានក្រឹមឡាំង លោក Dmitry Peskov បានអំពាវនាវឲ្យមានការទទួលស្គាល់ពីអន្តរជាតិចំពោះតួនាទីរបស់រុស្ស៊ីក្នុងការផ្គត់ផ្គង់ថាមពលពិភពលោក។ ការទាមទារនេះមកបន្ទាប់ពីអាមេរិកបានបន្ធូរបន្ថយទណ្ឌកម្មលើប្រេងរុស្ស៊ី ដើម្បីដោះស្រាយវិបត្តិថាមពលក្នុងអំឡុងពេលជម្លោះនៅមជ្ឈិមបូព៌ា។

ក្នុងសន្និសីទប្រចាំថ្ងៃ លោក Peskov បានថ្លែងថា៖ «រុស្ស៊ីនៅតែជាអ្នកផ្គត់ផ្គង់ដ៏សំខាន់ និងទទួលខុសត្រូវខ្លាំងក្នុងទីផ្សារថាមពលសកល។ ទីផ្សារកំពុងឆ្លងកាត់ពេលវេលាលំបាក ហើយបរិមាណរបស់រុស្ស៊ីពិបាកនឹងមើលរំលង»។

កាលពីខែមីនា ក្រសួងហិរញ្ញវត្ថុអាមេរិកបានលើកលែងទណ្ឌកម្មលើផលិតផលប្រេង និងប្រេងកាតរុស្ស៊ី ដើម្បីធានាស្ថេរភាពតម្លៃ។ វិធានការទាំងនេះត្រូវបានស្ដារឡើងវិញមុនការលើកលែងថ្មីដែលប្រកាសកាលពីថ្ងៃសុក្រ។

ចលនានេះជាផ្នែកនៃកិច្ចខិតខំប្រឹងប្រែងរបស់រដ្ឋបាលអាមេរិកក្នុងការគ្រប់គ្រងតម្លៃថាមពលដែលឡើងខ្ពស់ក្នុងអំឡុងពេលសង្គ្រាមអាមេរិក-អ៊ីស្រាអែលជាមួយអ៊ីរ៉ង់។ វាកើតឡើងបន្ទាប់ពីប្រទេសអាស៊ីដែលរងផលប៉ះពាល់ពីវិបត្តិថាមពលបានដាក់សម្ពាធលើវ៉ាស៊ីនតោនឲ្យអនុញ្ញាតការផ្គត់ផ្គង់ជំនួស។

ទោះជាយ៉ាងណា ប្រធានាធិបតីអ៊ុយក្រែន លោក Volodymyr Zelenskyy បានសម្តែងការព្រួយបារម្ភយ៉ាងខ្លាំងនៅលើបណ្តាញសង្គមថា ការបន្តបន្ធូរបន្ថយទណ្ឌកម្មប្រឆាំងនឹងរុស្ស៊ី អាចជំរុញឲ្យមានការយល់ច្រឡំថា មូស្គូអាចបន្តសង្គ្រាមបានទៅមុខទៀត។

អត្ថបទ៖ សាង ស្រីល័ក្ខ