By ស្ថានទូតសហរដ្ឋអាមេរិកប្រចាំទីក្រុងបេរូត បានចេញសេចក្តីជំរុញឱ្យពលរដ្ឋអាមេរិកទាំងអស់ដែលស្ថិតនៅក្នុងប្រទេសលីបង់ ចាកចេញពីប្រទេសនេះភ្លាមៗ ដោយសារស្ថានភាពសន្តិសុខមានការប្រែប្រួលយ៉ាងឆាប់រហ័ស។
ក្នុងសេចក្តីថ្លែងការណ៍ផ្លូវការនាថ្ងៃពុធ ទី២២ មេសា ស្ថានទូតបានបញ្ជាក់ថា៖ «យើងសូមជំរុញឱ្យពលរដ្ឋអាមេរិកចាកចេញពីប្រទេសលីបង់ ខណៈដែលជម្រើសជើងហោះហើរនៅមាន»។
ស្ថានទូតបានបន្ថែមថា៖ «សម្រាប់ពលរដ្ឋអាមេរិកដែលជ្រើសរើសមិនចាកចេញ យើងសូមណែនាំឱ្យរៀបចំផែនការបន្ទាន់សម្រាប់ស្ថានភាពអាសន្ន និងតាមដានព័ត៌មានអំពីការវិវត្តថ្មីៗ»។
ក្រៅពីនេះ អាមេរិកក៏បានព្រមានអំពីហានិភ័យនៃអំពើភេរវកម្ម និងការចាប់ជំរិតជាបន្តបន្ទាប់នៅទូទាំងប្រទេសលីបង់។ ទីកន្លែងដែលពលរដ្ឋ និងអ្នកទេសចរអាមេរិកទៅទស្សនាជាញឹកញាប់ អាចក្លាយជាគោលដៅសម្រាប់ការវាយប្រហារ។
សេចក្តីថ្លែងការណ៍នេះកើតឡើងបន្ទាប់ពីការបាញ់គ្នារវាងកងទ័ពអ៊ីស្រាអែល និងក្រុមហេសបូឡារបស់លីបង់។ ទោះបីជាមានការឈប់បាញ់រយៈពេល១០ថ្ងៃចាប់ផ្តើមនាថ្ងៃសុក្រ ក៏ភាពតានតឹងនៅតែបន្តកើនឡើង។
គួរបញ្ជាក់ថា ការវាយប្រហាររបស់អ៊ីស្រាអែលទៅលើលីបង់បានធ្វើឱ្យមនុស្ស២,២៩៤នាក់ស្លាប់ របួស៧,៥៤៤នាក់ និងមានមនុស្សជាង១លាននាក់ផ្លាស់ទីលំនៅ ចាប់តាំងពីថ្ងៃទី០២ ខែមីនា។
ការណែនាំរបស់ស្ថានទូតអាមេរិកត្រូវបានចេញផ្សាយមុនថ្ងៃនៃការចរចាដែលសម្របសម្រួលដោយសហរដ្ឋអាមេរិករវាងលីបង់និងអ៊ីស្រាអែល ដែលគ្រោងនឹងធ្វើឡើងនៅថ្ងៃព្រហស្បតិ៍ នៅទីក្រុងវ៉ាស៊ីនតោន។
