By ភ្នំពេញ៖ លោក ជា វុទ្ធី អគ្គលេខាធិការគណៈកម្មាធិការវិនិយោគកម្ពុជា (CDC) បានអញ្ជើញថ្លែងសុន្ទរកថាក្នុងកិច្ចសន្ទនាធុរកិច្ចកម្ពុជា-វៀតណាម ឆ្នាំ២០២៦ កាលពីរសៀលថ្ងៃទី២២ ខែមេសា ដោយសហការរៀបចំឡើងដោយស្ថានទូតវៀតណាមប្រចាំកម្ពុជា និងសមាគមធុរកិច្ចកម្ពុជា-វៀតណាម។
កិច្ចសន្ទនានេះមានគោលបំណងពង្រឹង និងពង្រីកកិច្ចសហប្រតិបត្តិការទ្វេភាគីលើវិស័យសេដ្ឋកិច្ច ពាណិជ្ជកម្ម និងវិនិយោគ ដោយមានការចូលរួមពីលោក Nguyen Minh Vu ឯកអគ្គរដ្ឋទូតវៀតណាមប្រចាំកម្ពុជា, អ្នកឧកញ៉ា គិត ម៉េង ប្រធានសភាពាណិជ្ជកម្មកម្ពុជា, លោក ហូ ស៊ីវយ៉ុង និងឧកញ៉ា ឡេង ឬទ្ធី។
លោក ជា វុទ្ធី បានវាយតម្លៃខ្ពស់ចំពោះទំនាក់ទំនងមិត្តភាព និងកិច្ចសហប្រតិបត្តិការស្អិតល្មួតរវាងប្រទេសទាំងពីរ។ លោកបានគូសបញ្ជាក់ពីបរិយាកាសវិនិយោគបើកចំហ និងសេរីរបស់កម្ពុជា ព្រមទាំងសក្តានុពលធនធានធម្មជាតិសម្បូរបែបក្នុងវិស័យកសិកម្ម និងកសិ-ឧស្សាហកម្ម។
ជាមួយគ្នានេះ លោកបានលើកឡើងពីវិស័យសក្តានុពលដែលវិនិយោគិនវៀតណាមអាចពិនិត្យលទ្ធភាពវិនិយោគ រួមមាន៖ ការកែច្នៃជ័រកៅស៊ូ ស្វាយចន្ទី ដំឡូងមី និងស្រូវជាដើម។ កម្ពុជាក៏មានការបើកទូលាយនៃទីផ្សារនាំចេញតាមរយៈប្រព័ន្ធអនុគ្រោះពន្ធ និងកិច្ចព្រមព្រៀងពាណិជ្ជកម្មសេរីនានាផងដែរ។
លោកអគ្គលេខាធិការបានបញ្ជាក់ថា ក្រុមប្រឹក្សាអភិវឌ្ឍន៍កម្ពុជាកំពុងជំរុញការបង្កើតភាពជាដៃគូយុទ្ធសាស្ត្រលើវិស័យសក្តានុពល និងអនុវត្តប្រកបដោយប្រសិទ្ធភាពនូវកិច្ចព្រមព្រៀង និងអនុស្សារណៈនៃការយោគយល់គ្នា ដើម្បីធានាផលប្រយោជន៍ជាអតិបរមា និងផ្តល់ភាពកក់ក្តៅដល់វិនិយោគិន។
គួររម្លឹកថា កិច្ចសន្ទនានេះត្រូវបានរៀបចំឡើងក្នុងគោលបំណងពង្រឹងកិច្ចសហប្រតិបត្តិការសេដ្ឋកិច្ច ពាណិជ្ជកម្ម និងវិនិយោគរវាងកម្ពុជា និងវៀតណាមឱ្យកាន់តែស៊ីជម្រៅថែមទៀត៕
ដោយ៖ តារា
