រដ្ឋមន្ត្រីកងទ័ពជើងទឹកអាមេរិកត្រូវបានបណ្តេញចេញភ្លាមៗ កណ្តាលវិបត្តិអ៊ីរ៉ង់ និងការប៉ះទង្គិចផ្ទៃក្នុងដ៏ធ្ងន់ធ្ងរ

ទីក្រុងវ៉ាស៊ីនតោន៖ រដ្ឋមន្ត្រីកងទ័ពជើងទឹកសហរដ្ឋអាមេរិក លោក John Phelan ត្រូវបានរដ្ឋបាលលោក ដូណាល់ ត្រាំ បណ្តេញចេញពីតំណែងភ្លាមៗ ក្រោយមានរបាយការណ៍ពីភាពមិនចុះសម្រុងផ្ទៃក្នុងធ្ងន់ធ្ងររវាងលោក និងថ្នាក់ដឹកនាំក្រសួងសង្គ្រាម ខណៈសង្គ្រាមនៅអ៊ីរ៉ង់កំពុងឈានដល់វិបត្តិ។

មន្ត្រីរដ្ឋបាលជាន់ខ្ពស់ម្នាក់បានបញ្ជាក់ប្រាប់ The Independent កាលពីល្ងាចថ្ងៃពុធថា លោក ត្រាំ និងរដ្ឋមន្ត្រីក្រសួងការពារជាតិ Pete Hegseth បានឯកភាពគ្នាជ្រើសរើសថ្នាក់ដឹកនាំថ្មី មុនពេល Hegseth ជូនដំណឹងផ្ទាល់ដល់លោក Phelan។

អ្នកនាំពាក្យក្រសួងការពារជាតិ Sean Parnell បានប្រកាសនៅលើបណ្តាញសង្គម X ថា៖ «លោក Phelan នឹងចាកចេញជាធរមានភ្លាមៗ» ដោយមិនផ្តល់ការពន្យល់លម្អិតទេ ប៉ុន្តែបានថ្លែងអំណរគុណចំពោះការបម្រើការរបស់លោក។

ប្រភពពី Axios បង្ហាញថា លោក Phelan ជាអតីតអ្នកហិរញ្ញវត្ថុ និងជាអ្នកបរិច្ចាគដ៏លេចធ្លោរបស់លោក ត្រាំ តែមិនព្រមគោរពតាមបញ្ជាពីថ្នាក់លើ ដោយប្រភពបានដកស្រង់សម្តីថា៖ «គាត់មិនយល់ថាគាត់មិនមែនជាចៅហ្វាយទេ»។ ភាពតានតឹងរវាងលោកនិងរដ្ឋមន្ត្រី Hegseth បានកើនឡើងជាបន្តបន្ទាប់។

ការបណ្តេញចេញនេះកើតឡើងនៅពេលដែលកងទ័ពជើងទឹកអាមេរិកកំពុងប្រឈមមុខជាមួយអ៊ីរ៉ង់ ដែលជាប្រទេសកំពុងរងការគំរាមកំហែងផ្នែកយោធា។ អតីតទីប្រឹក្សាជាន់ខ្ពស់រដ្ឋបាលលោក Obama Dan Pfeiffer បានសរសេរថា ពេលវេលានេះគឺ «ចម្លែក» សម្រាប់ការចាកចេញរបស់រដ្ឋមន្ត្រីកងទ័ពជើងទឹក។

ចំណែក Sarah Longwell ទីប្រឹក្សានយោបាយ បានវាយតម្លៃថា ការចាកចេញនេះកើតឡើងនៅពេលដ៏គ្រោះថ្នាក់ ខណៈអាមេរិកកំពុងស្ថិតក្នុងការប្រឈមមុខដាក់គ្នាផ្នែកយោធាជាមួយអ៊ីរ៉ង់។ នេះជាការផ្លាស់ប្តូរថ្នាក់ដឹកនាំផ្នែកការពារជាតិដ៏សំខាន់លើកទីពីរក្នុងរដ្ឋបាល ត្រាំ។