By សង្គ្រាមអ៊ុយក្រែន៖ បំពង់បង្ហូរប្រេងឌ្រូស្ប៉ា (មិត្តភាព) ដែលដឹកប្រេងរុស្ស៊ីឆ្លងកាត់អ៊ុយក្រែនទៅកាន់ហុងគ្រី និងស្លូវ៉ាគី ត្រូវបានទីក្រុងកៀវយល់ព្រមបើកដំណើរការឡើងវិញ បន្ទាប់ពីជួសជុលរួចរាល់ ដោយប្រេងបានចាប់ផ្ដើមបញ្ជូនទៅហុងគ្រីវិញនៅថ្ងៃទី២២ ខែមេសា។
នេះជាការបញ្ចប់កណ្ដាប់ដៃដែករបស់អ៊ុយក្រែន ដែលមានតាំងពីយូរមកហើយជាមួយហុងគ្រី ក្រោយប្រទេសនេះលែងរាំងខ្ទប់ប្រាក់កម្ចីដ៏សំខាន់ពីសហភាពអឺរ៉ុប។ បំពង់បង្ហូរប្រេងរងការខូចខាតដោយការវាយប្រហាររបស់រុស្ស៊ីកាលពីខែមករា ហើយលែងដំណើរការតាំងពីពេលនោះមក។ នាយករដ្ឋមន្ត្រីជាតិនិយមហុងគ្រីលោក វិកទ័រ អូបង់ បានចោទប្រកាន់អាជ្ញាធរអ៊ុយក្រែនថា អូសក្រឡាក្នុងការជួសជុលចាំបាច់។ ជាការសងសឹក លោកអូបង់បានរាំងខ្ទប់ប្រាក់កម្ចីអឺរ៉ុប៩០ពាន់លានអឺរ៉ូដល់អ៊ុយក្រែន។
ចំណែកស្លូវ៉ាគី ដែលពឹងផ្អែកខ្លាំងលើប្រេងរុស្ស៊ីដែរ បានគំរាមរារាំងការអនុម័តទណ្ឌកម្មថ្មីរបស់សហភាពអឺរ៉ុបលើរុស្ស៊ី។ ដោយសារសម្ពាធទាំងនេះ ទើបអ៊ុយក្រែនយល់ព្រមជួសជុលបំពង់បង្ហូរប្រេងឡើងវិញ។ នេះបើតាមការអះអាងរបស់ប្រធានាធិបតីអ៊ុយក្រែនលោក វ៉ូឡូឌីមៀរ ហ្សេឡេនស្គី។
ក្រុមហ៊ុនអ៊ុយក្រែនដែលទទួលបន្ទុកផ្នែកអ៊ុយក្រែននៃបំពង់បង្ហូរប្រេងអះអាងថា ការផ្គត់ផ្គង់ប្រេងបានចាប់ផ្ដើមហើយ។ ក្រុមហ៊ុនប្រេងហុងគ្រី MOL ថ្លែងថា ប្រេងពិតជាបានមកដល់ព្រំដែនបេឡារុសនៅថ្ងៃទី២២ ខែមេសាវេលាថ្ងៃត្រង់ ហើយនឹងទៅដល់ហុងគ្រីត្រឹមថ្ងៃទី២៣ ខែមេសា។
