By តម្លៃប្រេងអន្តរជាតិបានកើនឡើងជាបន្តបន្ទាប់ លើស ១០០ ដុល្លារ/បារ៉ែល ជាថ្មី ក្រោយធ្លាក់ចុះក្រោមកម្រិតនេះអស់រយៈពេល ២ សប្ដាហ៍ ចំពេលការចរចាសន្ដិភាពរវាងសហរដ្ឋអាមេរិក និងអ៊ីរ៉ង់ត្រូវជាប់គាំង ដោយប្រទេសទាំង២បន្តបិទច្រកហ័រមូហ្សតាមវិធីរៀងៗខ្លួន។
តម្លៃប្រេងឆៅម៉ាក Brent បានកើនឡើង ០,៤៧ ដុល្លារ ឬ ០,៤៦% ដល់ ១០២,៤ ដុល្លារ/បារ៉ែល គិតត្រឹមម៉ោង ១០ ព្រឹក នៅទីក្រុងហុងកុង ខណៈតម្លៃប្រេងអាមេរិក WTI វិញ បានកើនឡើង ០,៦៤ ដុល្លារ ឬ ០,៦៩% ដល់ ៩៣,៦០ ដុល្លារ/បារ៉ែល។
តម្លៃប្រេងទាំង២ បានកើនឡើងជាង ៣ ដុល្លារ ពេលបិទការជួញដូរកាលពីថ្ងៃពុធ ដោយសារតែការធ្លាក់ចុះច្រើនជាងការរំពឹងទុកនៃប្រេងចម្រាញ់ក្នុងស្ដុករបស់អាមេរិក ដែលបង្ហាញពីតម្រូវការរឹងមាំ និងអវត្តមាននៃវឌ្ឍនភាពក្នុងការចរចាសន្ដិភាពអាមេរិក-អ៊ីរ៉ង់។
ខណៈលោក ត្រាំ បានពង្រីកពេលអនុវត្តបទឈប់បាញ់តាមសំណើរបស់ប៉ាគីស្ថាន ភាពតានតឹងនៅតែខ្ពស់ ដោយអ៊ីរ៉ង់ និងអាមេរិកនៅតែរឹតត្បឹតការដឹកជញ្ជូនឆ្លងកាត់ច្រកសមុទ្រហ័រមូហ្ស ដែលជាផ្លូវសំខាន់ដឹកជញ្ជូនប្រេង និងឧស្ម័ន ២០% ស្រាប់ទីផ្សារពិភពលោក។
កាលពីថ្ងៃពុធ អ៊ីរ៉ង់បានរឹបអូសនាវា ២ គ្រឿងនៅច្រកហ័រមូហ្ស ខណៈអាមេរិកបន្តបិទផ្លូវទឹកសម្រាប់ពាណិជ្ជកម្មចេញចូលកំពង់ផែអ៊ីរ៉ង់។ មន្រ្តីអ្នកចរចាអ៊ីរ៉ង់ លោក Mohammad Baqer Qalibaf បាននិយាយថា បទឈប់បាញ់ពេញលេញអាស្រ័យលើការដកចេញនូវការបិទខ្ទប់នោះ។
ទន្ទឹមនឹងនេះ អាមេរិកបានស្ទាក់ចាប់នាវាដឹកប្រេងអ៊ីរ៉ង់យ៉ាងហោចណាស់ ៣ គ្រឿងនៅក្នុងដែនទឹកអាស៊ី ដោយបានបង្វែរពួកគេចេញពីតំបន់ជិតប្រទេសឥណ្ឌា ម៉ាឡេស៊ី និងស្រីលង្កា។
ទោះបីជាលោក ត្រាំ ធ្លាប់បានគំរាមកម្ទេចហេដ្ឋារចនាសម្ព័ន្ធអ៊ីរ៉ង់ក៏ដោយ លោកបានបន្ធូរការគំរាម ដោយមិនបានកំណត់កាលបរិច្ឆេទបញ្ចប់សម្រាប់បទឈប់បាញ់នោះទេ។ យ៉ាងណាមិញ ទីផ្សារប្រេងអន្តរជាតិនៅតែប្រែប្រួលខ្លាំង ដោយវិនិយោគិនបន្តឃ្លាំមើលពីការវិវត្តប្រចាំថ្ងៃនៃជម្លោះ ចំពេលដំណោះស្រាយរយៈពេលវែងមិនទាន់លេចចេញនៅឡើយ៕
