By ខេត្តបាត់ដំបង៖ បរិយាកាសនៅបរិវេណវិមានឯករាជ្យ ក្រុងបាត់ដំបង កាលពីព្រឹកថ្ងៃទី២៦ ខែមេសា ឆ្នាំ២០២៦ មានភាពអធិកអធមយ៉ាងខ្លាំង ក្រោមស្នាមញញឹមរីករាយ និងស្មារតីសាមគ្គីជាតិខ្មែរ ខណៈដែលព្រឹត្តិការណ៍កីឡារត់ប្រណាំង ក្រោមប្រធានបទ «រត់ដើម្បីក្ដីស្រឡាញ់ រត់ដើម្បីសប្បុរសធម៌ រត់ដើម្បីទេសចរណ៍» ត្រូវបានរៀបចំឡើងក្នុងគោលបំណងកៀរគរធនធានជួយឧបត្ថម្ភគាំទ្រដល់កងកម្លាំងជួរមុខដែលកំពុងបំពេញភារកិច្ចការពារបូរណភាពទឹកដីនៅតាមខ្សែបន្ទាត់ព្រំដែនកម្ពុជា-ថៃ។
លោក សុខ លូ អភិបាលនៃគណៈអភិបាលខេត្តបាត់ដំបង បានអញ្ជើញជាអធិបតីក្នុងពិធីបើកកម្មវិធីដ៏មហាធំនេះ។ លោកអភិបាលខេត្តបានសម្តែងនូវអារម្មណ៍សប្បាយរីករាយដោយបានឃើញមន្ត្រីរាជការ និងបងប្អូនប្រជាពលរដ្ឋគ្រប់វណ្ណៈជាច្រើនកុះករបានចេញមុខចូលរួមបង្ហាញសាមគ្គីភាព។
លោក សុខ លូ បានថ្លែងអំណរគុណយ៉ាងជ្រាលជ្រៅចំពោះ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ដែលតែងតែផ្តល់ការអនុញ្ញាតឱ្យរដ្ឋបាលខេត្តរៀបចំព្រឹត្តិការណ៍មនុស្សធម៌បែបនេះ។
ក្នុងសារលើកទឹកចិត្ត លោកអភិបាលខេត្តបានបង្ហាញជំនឿយ៉ាងមុតមាំថា ប្រជាពលរដ្ឋខ្មែរទូទាំងប្រទេស ជាពិសេសក្នុងខេត្តបាត់ដំបង មានស្មារតីរួបរួមគ្នាដើម្បីជាតិ។ លោកសង្ឃឹមថា ចាប់ពីពេលនេះតទៅ ប្រជាពលរដ្ឋខ្មែរគ្រប់រូបត្រូវមានមនសិការជាតិនិយមខ្ពស់ ដើម្បីអនាគតកូនចៅខ្មែរជំនាន់ក្រោយ និងធានាឱ្យប្រទេសជាតិបន្តរស់នៅក្នុងសន្តិភាព និងការអភិវឌ្ឍន៍រីកចម្រើន។
ព្រឹត្តិការណ៍នេះបានឆ្លុះបញ្ចាំងពីសាមគ្គីភាពដ៏រឹងមាំរបស់ប្រជាជនកម្ពុជា ក្នុងការរួមគ្នាទ្រទ្រង់កងកម្លាំងប្រដាប់អាវុធដែលកំពុងឈរជើងការពារមាតុភូមិនៅតាមព្រំដែនជាតិ។
ពិធីនេះប្រព្រឹត្តទៅប្រកបដោយក្តីរីករាយ និងសាមគ្គីភាព ដោយមានការចូលរួមពីស្រទាប់យុវជន មន្ត្រីរាជការ និងសាធារណជនទូទៅ រួមទាំងមានការតាំងពិព័រណ៍ផលិតផល និងការសម្តែងសិល្បៈវប្បធម៌បន្ថែមទៀតផងដែរ។
