អធិការបតីអាល្លឺម៉ង់ ស្នើអ៊ុយក្រែនបោះបង់ទឹកដីដើម្បីសន្តិភាព និងចូលសហភាពអឺរ៉ុប

ថ្នាក់ដឹកនាំអាល្លឺម៉ង់ លោក Friedrich Merz បានថ្លែងថា អ៊ុយក្រែនអាចនឹងត្រូវទទួលយកការបាត់បង់ទឹកដីមួយផ្នែក ជាថ្នូរនឹងកិច្ចព្រមព្រៀងសន្តិភាពជាមួយរុស្ស៊ី ដើម្បីបើកផ្លូវឆ្ពោះទៅរកការចូលជាសមាជិកសហភាពអឺរ៉ុប (EU)។ នេះបើតាមការចុះផ្សាយពីទីភ្នាក់ងារសារព័ត៌មាន Yahoo នៅថ្ងៃទី២៨ ខែមេសា។

លោក Merz បានលើកឡើងក្នុងព្រឹត្តិការណ៍មួយនៅទីក្រុង Marsberg កាលពីថ្ងៃទី២៧ ខែមេសាថា៖ «នៅចំណុចណាមួយ អ៊ុយក្រែននឹងចុះហត្ថលេខាលើកិច្ចព្រមព្រៀងឈប់បាញ់ ហើយសង្ឃឹមថា នឹងមានកិច្ចព្រមព្រៀងសន្តិភាពជាមួយរុស្ស៊ី។ នៅពេលនោះ ទឹកដីមួយផ្នែករបស់អ៊ុយក្រែន ប្រហែលជាមិនមែនជារបស់ពួកគេទៀតឡើយ»។

លោកបានបន្ថែមថា កិច្ចព្រមព្រៀងសន្តិភាពជាមួយរុស្ស៊ីគឺជាអ្វីដែលអ៊ុយក្រែនត្រូវតែសម្រេចឲ្យបាន ដើម្បីបើកផ្លូវសម្រាប់ដំណើរការចូលជាសមាជិក EU។ ទីក្រុងកៀវនៅតែបន្តបដិសេធយ៉ាងដាច់អហង្ការចំពោះការទាមទារឲ្យធ្វើសម្បទានទឹកដី។

មេដឹកនាំអាល្លឺម៉ង់រូបនេះបានថ្លែងថា លោក ហ្សេឡេនស្គី នឹងត្រូវការការបោះឆ្នោតប្រជាមតិ ដើម្បីសម្រេចលើបញ្ហានេះ ហើយលោកត្រូវប្រាប់ប្រជាជនថា៖ «ខ្ញុំបានបើកផ្លូវសម្រាប់អ្នករាល់គ្នាឆ្ពោះទៅកាន់អឺរ៉ុបហើយ»។

ទោះជាយ៉ាងណា លោក Merz បានព្រមានកុំឲ្យមានសុទិដ្ឋិនិយមហួសហេតុពេក។ លោកបញ្ជាក់ថា អ៊ុយក្រែនមិនអាចចូលរួមជាមួយ EU បានទេ ខណៈពេលកំពុងមានសង្គ្រាម ហើយត្រូវតែបំពេញតាមលក្ខណៈវិនិច្ឆ័យតឹងរឹងជាមុនសិន រួមទាំងនីតិរដ្ឋ និងការប្រឆាំងអំពើពុករលួយ។

លោកបានបន្ថែមថា កាលបរិច្ឆេទដែលលោកហ្សេឡេនស្គីធ្លាប់លើកឡើងថា អ៊ុយក្រែននឹងក្លាយជាសមាជិក EU នៅថ្ងៃទី១ ខែមករា ឆ្នាំ២០២៧ គឺមិនអាចទៅរួចទេ។ សូម្បីតែឆ្នាំ២០២៨ ក៏មិនប្រាកដនិយមដែរ។

ជាជម្រើស លោក Merz បានស្នើឲ្យផ្ដល់តួនាទីជាអ្នកសង្កេតការណ៍ដល់អ៊ុយក្រែន នៅក្នុងស្ថាប័ននានារបស់ EU ដែលជាសំណើទទួលបានការគាំទ្រពីមេដឹកនាំអឺរ៉ុបជាច្រើនក្នុងកិច្ចប្រជុំកំពូលកាលពីសប្ដាហ៍មុននៅប្រទេសស៊ីប៕