By អន្តរជាតិ៖ រឿងសោកនាដកម្មដ៏រន្ធត់មួយបានលាតត្រដាងឡើង ខណៈអាជ្ញាធររដ្ឋផ្លរីដាបានចេញមកបញ្ជាក់ពីព័ត៌មានលម្អិតគួរឱ្យព្រួយបារម្ភជុំវិញការបាត់ខ្លួន និងការសម្លាប់និស្សិតបណ្ឌិតវ័យក្មេងពីរនាក់នៅសាកលវិទ្យាល័យ South Florida (USF)។
ជនរងគ្រោះទាំងពីរនាក់មានឈ្មោះ Zamil Limon និង Nahida Bristy អាយុ ២៧ឆ្នាំ ដែលមានដើមកំណើតមកពីប្រទេសបង់ក្លាដែស។ ពួកគេត្រូវបានគេឃើញចុងក្រោយកាលពីជិតពីរសប្តាហ៍មុន។ សាកសពរបស់ Limon ត្រូវបានគេរកឃើញមួយសប្តាហ៍ក្រោយបាត់ខ្លួន រីឯអ្នកស៊ើបអង្កេតជឿជាក់ថា Bristy ក៏ត្រូវបានគេសម្លាប់ផងដែរ។
ជនសង្ស័យដែលត្រូវបានចោទប្រកាន់គឺ Hisham Abugharbieh ដែលជាមិត្តរួមបន្ទប់របស់ Limon ត្រូវបានចោទប្រកាន់ពីបទឃាតកម្មដោយចេតនាកម្រិតទីមួយចំនួនពីរករណី ដោយប្រើប្រាស់អាវុធក្នុងការសម្លាប់និស្សិតទាំងពីរ។ គាត់គ្រោងនឹងបង្ហាញខ្លួននៅតុលាការសម្រាប់ការស្តាប់សវនាការនៅថ្ងៃអង្គារនេះ។
ព្រះរាជអាជ្ញាបានដាក់ញត្តិកាលពីសប្តាហ៍មុន ដើម្បីស្នើសុំឃុំខ្លួន Abugharbieh ជាបណ្តោះអាសន្ន ដោយបង្ហាញពីពេលវេលាលម្អិត និងដំណើរការដែលអ្នកស៊ើបអង្កេតជឿថាជាមូលហេតុនៃការស្លាប់របស់និស្សិតទាំងពីរ។
ថ្ងៃទី ១៦ ខែមេសា៖ ទំនាក់ទំនងចុងក្រោយ
មិត្តភក្តិរបស់ Limon និង Bristy បានទាក់ទងជាមួយពួកគេនៅពេលថ្ងៃ ប៉ុន្តែក្រោយមកមិនអាចទាក់ទងសារជាថ្មីបានឡើយ។ កាមេរ៉ាឃ្លាំមើលបានថតឃើញ Bristy ដើរនៅក្នុងបរិវេណសាលា USF នៅម៉ោងប្រហែលថ្ងៃត្រង់។ មិត្តភក្តិម្នាក់បាននិយាយជាមួយ Bristy និងយល់ព្រមយកវ៉ែនតាមកជូននាងនៅពេលល្ងាច ប៉ុន្តែ Bristy មិនបានបង្ហាញខ្លួនឡើយ។
យោងតាមព្រះរាជអាជ្ញា Bristy និង Limon បាននិយាយទូរស័ព្ទគ្នាជាច្រើនលើក។ ទីតាំងទូរស័ព្ទរបស់ Limon បង្ហាញថាគាត់នៅក្បែរផ្ទះ និងបរិវេណសាលា មុនពេលធ្វើដំណើរទៅកាន់ Clearwater ដែលមានចម្ងាយប្រហែល ៣២ ម៉ាយពីលំនៅដ្ឋានរបស់គាត់ នៅម៉ោងប្រហែល ៧:៤៣ យប់។
ប្រភព៖ (CNN)
