By សមត្ថកិច្ចកម្ពុជា បានបណ្តេញជនជាតិថៃចំនួន ៦៣៥នាក់ ដែលពាក់ព័ន្ធនឹងការលបលួចធ្វើអាជីវកម្មអនឡាញខុសច្បាប់ និងបណ្តាញឧក្រិដ្ឋកម្មឆ្លងដែន ចេញពីប្រទេសកម្ពុជាកាលពីថ្ងៃទី ៣០ ខែមេសា ឆ្នាំ ២០២៦ តាមច្រកទ្វារអន្តរជាតិប៉ោយប៉ែត ខេត្តបន្ទាយមានជ័យ។
ការបណ្តេញចេញនេះ ធ្វើឡើងបន្ទាប់ពីសមត្ថកិច្ចបានបំពេញបែបបទស្របតាមច្បាប់នៃព្រះរាជាណាចក្រកម្ពុជា ដោយមានការសម្របសម្រួលសហការរវាងសមត្ថកិច្ចកម្ពុជា និងថៃ។ ចំណែកជនសង្ស័យចំនួន ៣០នាក់ កំពុងត្រូវបានរៀបចំអនុវត្តនីតិវិធីច្បាប់បន្តចំពោះបទល្មើសដែលបានប្រព្រឹត្ត។
គួរបញ្ជាក់ថា នៅថ្ងៃទី ២៥ ខែមេសា ឆ្នាំ ២០២៦ កម្លាំងប្រតិបត្តិការចម្រុះរបស់កម្ពុជា ក្រោមការដឹកនាំរបស់អគ្គស្នងការដ្ឋាននគរបាលជាតិ និងដោយមានការសម្របសម្រួលនីតិវិធីពីអយ្យការអមសាលាដំបូងខេត្តបន្ទាយមានជ័យ បានចុះត្រួតពិនិត្យ និងឆែកឆេរទីតាំងមួយមានសណ្ឋានជាអគារខុនដូ នៅក្រុងប៉ោយប៉ែត។
តាមលទ្ធផលបឋម អាជ្ញាធរកម្ពុជាបានរកឃើញវត្ថុតាងជាច្រើន រួមមាន៖ ទូរស័ព្ទដៃ ៤,៦៨៥គ្រឿង, Monitor ចំនួន ៤១៦គ្រឿង, និងឧបករណ៍ពាក់ព័ន្ធផ្សេងៗទៀត។ ការត្រួតពិនិត្យឧបករណ៍អេឡិចត្រូនិកក៏បានរកឃើញវេបសាយល្បែងអនឡាញជាច្រើន ដែលមានទិសដៅអតិថិជនទៅកាន់ប្រទេសថៃ។
ប្រតិបត្តិការនេះ បង្ហាញពីការប្តេជ្ញាចិត្តយ៉ាងម៉ឺងម៉ាត់របស់រាជរដ្ឋាភិបាលកម្ពុជា ក្នុងការបង្ក្រាបបទល្មើសឆ្លងដែន និងអាជីវកម្មអនឡាញខុសច្បាប់ ដែលប្រព្រឹត្តិទៅលើទឹកដីកម្ពុជា។
ការបណ្តេញជនជាតិថៃទាំង ៦៣៥នាក់នេះ គឺជាផ្នែកមួយនៃកិច្ចសហប្រតិបត្តិការរវាងកម្ពុជា-ថៃ ក្នុងការទប់ស្កាត់ឧក្រិដ្ឋកម្មឆ្លងដែន និងពង្រឹងសន្តិសុខក្នុងតំបន់។
