អ៊ីស្រាអែលវាយប្រហារទីក្រុងបេរូតម្ដងទៀត ដោយអះអាងថាបានសម្លាប់មេបញ្ជាការយោធាហេសបូឡារូបថ្មី

អ៊ីស្រាអែលបានបើកការវាយប្រហារតាមផ្លូវអាកាសលើទីក្រុងបេរូត រដ្ឋធានីនៃប្រទេសលីបង់ ជាថ្មីម្ដងទៀត ទោះបីជាមានកិច្ចព្រមព្រៀងឈប់បាញ់រួចហើយក្ដី។ ភាគីអ៊ីស្រាអែលអះអាងថា ខ្លួនបានធ្វើឃាតលោក Malek Balou ដែលជាមេបញ្ជាការកងកម្លាំងពិសេស Radwan របស់ក្រុមហេសបូឡា។

ទីភ្នាក់ងារសារព័ត៌មានរដ្ឋលីបង់ NNA បានរាយការណ៍ថា យន្តហោះចម្បាំងអ៊ីស្រាអែលបានទម្លាក់គ្រាប់បែកកំណត់គោលដៅលើតំបន់ Ghobeiri នៅជាយក្រុងភាគខាងត្បូងនៃទីក្រុងបេរូត។ នាយករដ្ឋមន្ត្រីអ៊ីស្រាអែល លោក Benjamin Netanyahu និងរដ្ឋមន្ត្រីក្រសួងការពារជាតិ Israel Katz បានចេញមុខបញ្ជាក់ថា ពួកគេជាអ្នកដឹកនាំការវាយប្រហារនេះដោយផ្ទាល់។

នេះជាការវាយប្រហារលើកដំបូងលើតំបន់ភាគខាងត្បូងទីក្រុងបេរូត ចាប់តាំងពីកិច្ចព្រមព្រៀងឈប់បាញ់រវាងអ៊ីស្រាអែល និងហេសបូឡាចូលជាធរមាននៅថ្ងៃទី ១៧ ខែមេសា។ ចាប់តាំងពីពេលនោះមក ភាគីទាំងពីរបានចោទប្រកាន់គ្នាទៅវិញទៅមកម្ដងហើយម្ដងទៀតអំពីការរំលោភបទឈប់បាញ់។

ទោះបីជាមានបទឈប់បាញ់ក៏ដោយ កងកម្លាំងអ៊ីស្រាអែលបានបន្តធ្វើសកម្មភាពយោធានៅភាគខាងត្បូង និងភាគខាងកើតលីបង់ ដោយបានសម្លាប់មនុស្សយ៉ាងហោចណាស់ ១៣ នាក់នៅថ្ងៃពុធ។ ក្នុងនោះ ការវាយប្រហារនៅជ្រលងភ្នំ Bekaa ភាគខាងកើតលីបង់ បានសម្លាប់មនុស្ស ៤ នាក់។

អ៊ីស្រាអែលបាននិយាយថា ខ្លួនបានវាយប្រហារគោលដៅរបស់ហេសបូឡានៅភាគខាងត្បូងលីបង់ បន្ទាប់ពីបានចេញការព្រមានជម្លៀសប្រជាជននៅតាមទីក្រុងរាប់សិប។ ទន្ទឹមនឹងនេះ ក្រុមហេសបូឡាក៏បានអះអាងទទួលខុសត្រូវចំពោះការវាយប្រហារជាច្រើនលើកលើកងកម្លាំងអ៊ីស្រាអែលនៅភាគខាងត្បូងលីបង់ និងការវាយប្រហារមកលើភាគខាងជើងអ៊ីស្រាអែលផងដែរ។

គួរបញ្ជាក់ថា ការវាយប្រហាររបស់អ៊ីស្រាអែលមកលើប្រទេសលីបង់បានសម្លាប់មនុស្សជាង ២,៧០០ នាក់ ចាប់តាំងពីថ្ងៃទី ២ ខែមីនា រួមទាំងមនុស្សរាប់សិបនាក់ចាប់តាំងពីបទឈប់បាញ់ថ្ងៃទី ១៧ ខែមេសា ដែលត្រូវបានសម្របសម្រួលដោយសហរដ្ឋអាមេរិក។ យោធាអ៊ីស្រាអែលបានឱ្យដឹងថា ខ្លួនបានបាត់បង់ទាហានចំនួន ១៧ នាក់ និងអ្នកម៉ៅការស៊ីវិលម្នាក់ទៀតនៅក្នុងការប្រយុទ្ធគ្នាផងដែរ។