By ខេត្តកណ្ដាល៖ ករណីគ្រោះថ្នាក់ចរាចរណ៍ដ៏គួរឲ្យរន្ធត់មួយ បានកើតឡើងនៅវេលាយប់ថ្ងៃទី៧ ខែឧសភា ឆ្នាំ២០២៦ ស្ថិតក្នុងស្រុកកណ្ដាលស្ទឹង ខេត្តកណ្ដាល ដោយមានការប៉ះទង្គិចគ្នាយ៉ាងពេញទំហឹងរវាងម៉ូតូមួយគ្រឿង និងរថយន្តមួយគ្រឿង បណ្ដាលឲ្យមនុស្សយ៉ាងហោចណាស់៣នាក់រងរបួស ក្នុងនោះម្នាក់មានស្ថានភាពធ្ងន់ធ្ងរ។
តាមប្រភពព័ត៌មានពីកន្លែងកើតហេតុបានឲ្យដឹងថា នៅមុនពេលកើតហេតុ គេឃើញម៉ូតូមួយគ្រឿងដឹកអ្នកជិះចំនួន៣នាក់ កំពុងធ្វើដំណើរតាមដងផ្លូវ។ លុះមកដល់ចំណុចកើតហេតុ ស្រាប់តែបានបុកជាមួយរថយន្តមួយគ្រឿងយ៉ាងពេញទំហឹង ធ្វើឲ្យអ្នកជិះម៉ូតូទាំង៣នាក់ដួលសន្លប់ និងរបួសជាទម្ងន់។
ភ្លាមៗក្រោយកើតហេតុ កម្លាំងសមត្ថកិច្ចជំនាញ និងក្រុមសង្គ្រោះបានចុះទៅដល់កន្លែងកើតហេតុភ្លាមៗ ដើម្បីធ្វើការអន្តរាគមន៍ និងបញ្ជូនជនរងគ្រោះទាំង៣នាក់ទៅសង្គ្រោះបន្ទាន់នៅមន្ទីរពេទ្យក្នុងតំបន់។ ចំពោះស្ថានភាពជនរងគ្រោះ គេដឹងថាម្នាក់ក្នុងចំណោមនោះរងរបួសធ្ងន់ ឯពីរនាក់ទៀតរបួសស្រាល។
ចំណែកភាគីរថយន្តវិញ ពុំទាន់មានព័ត៌មានលម្អិតនៅឡើយទេ ខណៈសមត្ថកិច្ចកំពុងបន្តស្រាវជ្រាវ និងវាស់វែងកន្លែងកើតហេតុតាមនីតិវិធីច្បាប់ ដើម្បីកំណត់ពីមូលហេតុពិតប្រាកដនៃគ្រោះថ្នាក់ចរាចរណ៍ដ៏រន្ធត់នេះ។ ករណីនេះកំពុងទាក់ទាញការចាប់អារម្មណ៍ពីសាធារណជន ដោយសារតែការប៉ះទង្គិចមានសន្ទុះខ្លាំង និងចំនួនអ្នករងរបួសច្រើននាក់៕
ដោយ៖ សូរិយា
