By ខេត្តកំពង់ស្ពឺ៖ សោកនាដកម្មដ៏រន្ធត់មួយបានកើតឡើងកាលពីវេលាម៉ោង០២:១០នាទី រំលងអធ្រាត្រ ថ្ងៃទី១០ ខែឧសភា ឆ្នាំ២០២៦ នៅចំណុចភូមិអង្គសង្គ្រាម ឃុំជង្រុក ស្រុកគងពិសី ខេត្តកំពង់ស្ពឺ ដោយយុវជនឈ្មោះ ធី វុត្តា អាយុត្រឹមតែ២២ឆ្នាំប៉ុណ្ណោះ បានបាត់បង់ជីវិតយ៉ាងអាណោចអធ័ម បន្ទាប់ពីជិះម៉ូតូបុកការដ្ឋានសាងសង់ស្ពានយ៉ាងពេញទំហឹង។
ហេតុការណ៍នេះ មិនមែនគ្រាន់តែជាសោកនាដកម្មសម្រាប់គ្រួសារជនរងគ្រោះនោះទេ ប៉ុន្តែថែមទាំងជាកញ្ចក់ឆ្លុះបញ្ចាំងពីបញ្ហា «សុវត្ថិភាពការដ្ឋានសាធារណៈ» ដែលសង្គមកម្ពុជាគួរតែយកចិត្តទុកដាក់ឲ្យបានខ្លាំងជាងនេះ។
តាមបទពិសោធន៍ ការដ្ឋានសាងសង់ផ្លូវ ឬស្ពាននៅលើដងផ្លូវសាធារណៈ ត្រូវអនុវត្តវិធានសុវត្ថិភាពឲ្យបានត្រឹមត្រូវ ជាពិសេសនៅពេលយប់។ វិធានសំខាន់ៗរួមមាន៖ ការដាក់ស្លាកសញ្ញាព្រមានដូចជា «គ្រោះថ្នាក់ខាងមុខ» «បន្ថយល្បឿន» «ផ្លូវវាង» ព្រមទាំងរបាំងសុវត្ថិភាព ភ្លើងសញ្ញា និងសម្ភារៈឆ្លុះពន្លឺនៅពេលយប់ ព្រមទាំងអ្នកសម្របសម្រួលចរាចរណ៍នៅចំណុចហានិភ័យ។
ក្នុងនាមជាសង្គមនីតិរដ្ឋ បើការស៊ើបអង្កេតរកឃើញថាការដ្ឋានខ្វះវិធានសុវត្ថិភាព ឬមិនបានដាក់សញ្ញាព្រមានត្រឹមត្រូវ រហូតបណ្តាលឲ្យមនុស្សស្លាប់ នោះភាគីពាក់ព័ន្ធអាចត្រូវទទួលខុសត្រូវទាំងផ្នែករដ្ឋប្បវេណី និងព្រហ្មទណ្ឌ រួមមានម្ចាស់គម្រោង ក្រុមហ៊ុនម៉ៅការ វិស្វករ និងមន្ត្រីជំនាញពាក់ព័ន្ធ។
ការសាងសង់មិនមែនផ្តោតតែលើការបញ្ចប់គម្រោងឲ្យទាន់ពេលនោះទេ ប៉ុន្តែ «សុវត្ថិភាពសាធារណៈ» ត្រូវស្ថិតនៅលំដាប់អាទិភាពទី១។ ព្រោះមួយវិនាទីនៃការធ្វេសប្រហែស អាចបំផ្លាញអនាគតគ្រួសារមួយទាំងមូល។ សូមឲ្យសោកនាដកម្មនេះក្លាយជាមេរៀនដ៏ឈឺចាប់សម្រាប់គ្រប់ការដ្ឋានសាងសង់ទូទាំងប្រទេស ដើម្បីកុំឲ្យមានការបាត់បង់ជីវិតដ៏សោកសៅបែបនេះកើតឡើងជាថ្មីទៀត៕
