By ទីក្រុងតេអេរ៉ង់៖ អ៊ីរ៉ង់បានចេញសេចក្ដីព្រមានយ៉ាងតឹងរ៉ឹងទៅកាន់បារាំង និងអង់គ្លេស បន្ទាប់ពីប្រទេសទាំងពីរប្រកាសពីផែនការបញ្ជូននាវាចម្បាំងទៅកាន់តំបន់ក្បែរច្រកសមុទ្រហ័រម៉ូស ដែលជាច្រកផ្លូវទឹកយុទ្ធសាស្ត្រដ៏សំខាន់របស់ពិភពលោក។
លោកកាសឹម ការីបាបាឌី (Kazem Gharibabadi) ឧបនាយករដ្ឋមន្ត្រីអ៊ីរ៉ង់ បានថ្លែងយ៉ាងច្បាស់ថា ប្រសិនបើប្រទេសទាំងពីរហ៊ានធ្វើដូច្នេះមែន ពួកគេនឹងត្រូវទទួលរងការឆ្លើយតបជាបន្ទាន់ និងយ៉ាងម៉ឺងម៉ាត់បំផុតពីសំណាក់អ៊ីរ៉ង់។ លោកបានបង្ហោះសារនៅលើបណ្ដាញសង្គមអ៊ិចថា ច្រកសមុទ្រហ័រម៉ូសមិនមែនជារបស់ប្រទេសដទៃក្រៅពីតំបន់មជ្ឈិមបូព៌ានោះទេ។
លោកបានសង្កត់ធ្ងន់ថា អ៊ីរ៉ង់មានសិទ្ធិអធិបតេយ្យលើច្រកសមុទ្រនេះ ហើយមានតែអ៊ីរ៉ង់មួយគត់ដែលអាចបង្កើតប្រព័ន្ធសន្តិសុខនៅក្នុងច្រកសមុទ្រនេះ។ អ៊ីរ៉ង់នឹងមិនអនុញ្ញាតឱ្យប្រទេសណាមួយជ្រៀតជ្រែកក្នុងកិច្ចការនេះជាដាច់ខាតឡើយ។
លោកការីបាបាឌីបានប្រកាសទៀតថា ការដាក់ពង្រាយនាវាពិឃាតរបស់ប្រទេសក្រៅតំបន់ ក្រោមលេសថាដើម្បីការពារនាវាដឹកទំនិញនោះ គឺគ្មានអ្វីក្រៅពីការចង់បង្កបញ្ហា និងធ្វើយុទ្ធោបនីយកម្មនៅលើច្រកផ្លូវទឹកដ៏សំខាន់នេះឡើយ។
ការថ្លែងនេះកើតឡើងបន្ទាប់ពីអង់គ្លេស និងបារាំងប្រកាសផែនការបញ្ជូននាវាចម្បាំងរបស់ខ្លួនទៅក្បែរច្រកហ័រម៉ូស ដោយចាត់ទុកជាផ្នែកមួយនៃកិច្ចខិតខំប្រឹងប្រែងជាពហុជាតិដើម្បីអមដំណើរកប៉ាល់ដឹកទំនិញឆ្លងកាត់ច្រកនេះ។ ប៉ុន្តែបច្ចុប្បន្នច្រកនេះនៅតែបិទជិតឈឹងដដែល ដោយមានតែកប៉ាល់តិចតួចបំផុតដែលអាចបើកកាត់ដោយសុវត្ថិភាព រួមទាំងកប៉ាល់ដឹកហ្គាសរបស់កាតាដែលទើបបើកកាត់ដោយមានការយល់ព្រមពីអ៊ីរ៉ង់ផងដែរ៕
ប្រភព៖ ញូស្វីក (Newsweek) និងប្រភពដទៃទៀត
