By ខេត្តកំពង់ចាម ៖ ផ្កាឈូករ័ត្នជាង ១០ម៉ឺនគុម្ពកំពុងរីកស្រស់បំព្រងនៅក្រោមស្ពានគីហ្ស៊ុណា ក្នុងសង្កាត់វាលវង់ ក្រុងកំពង់ចាម ទាក់ទាញភ្ញៀវទេសចរជិតឆ្ងាយមកកម្សាន្តរាល់ថ្ងៃ ជាពិសេសថ្ងៃចុងសប្តាហ៍ មានអ្នកមកលេងរហូតដល់ជាង ១០០០នាក់ក្នុងមួយថ្ងៃ។
ប្រជាពលរដ្ឋឈ្មោះ ងី ស្រីនិត អាយុ ២៤ឆ្នាំ រស់នៅស្រុកកោះសូទិន បានរៀបរាប់ថា ក្រោយឃើញផ្កាទាំងនេះតាមបណ្ដាញសង្គម ក៏ឆ្លៀតពេលទំនេរជិះម៉ូតូមកមើលផ្ទាល់ ហើយបានឃើញផ្កាឈូករ័ត្នរាប់ពាន់គុម្ពរីកស្រស់បំព្រង ធ្វើឱ្យការនឿយហត់ក្នុងខ្លួនបានរសាយអស់។ នាងថា នេះជាលើកដំបូងដែលបានឃើញទិដ្ឋភាពផ្កាចម្រុះពណ៌ស្អាតគួរឱ្យគយគន់ ហើយគ្រោងនឹងនាំមិត្តភក្តិមកលេងទៀត។
លោក លី សុវណ្ណ អភិបាលក្រុងកំពង់ចាម បានឱ្យដឹងនាល្ងាចថ្ងៃទី ១៣ឧសភាថា ក្រោមការចង្អុលបង្ហាញពី ឯកឧត្តម អ៊ុន ចាន់ដា អភិបាលខេត្ត បានឱ្យលោកនិងមន្ត្រីពាក់ព័ន្ធយកចិត្តទុកដាក់រកពូជផ្កាល្អៗមកដាំនៅទីតាំងនេះ ដោយមានរហូតដល់ជាង ១០ម៉ឺនគុម្ព។ ផ្កាឈូករ័ត្នបានចាប់រីកតាំងពីមុនបុណ្យចូលឆ្នាំរហូតមកដល់ពេលនេះ គឺរីកគ្រប់ដើម។
លោកអភិបាលក្រុងបន្ថែមថា សម្រាប់ឆ្នាំ ២០២៧ អាជ្ញាធរនឹងប្រឹងប្រែងរកពូជផ្កាផ្សេងទៀតមកដាំនៅទីតាំងដដែល ដើម្បីបន្តទាក់ទាញភ្ញៀវជាតិនិងអន្តរជាតិឱ្យមកកម្សាន្ត គយគន់ទេសភាពមាត់ទន្លេ ខ្យល់ត្រជាក់ ធ្វើឱ្យអារម្មណ៍ស្រស់ស្រាយពីការនឿយហត់ក្នុងការងារ។
សម្រស់ផ្កាទាំងនេះពិតជាបានទាក់ទាញភ្ញៀវទេសចរ និងបង្ហាញពីការយកចិត្តទុកដាក់របស់អាជ្ញាធរក្រុងនិងខេត្ត ដែលគួរទទួលបានការកោតសរសើរ។
