By ខេត្តសៀមរាប – អាជ្ញាធរជាតិអប្សរាបានចេញសេចក្តីជូនដំណឹងព្រមានដល់សាធារណជន និងភ្ញៀវទេសចរទាំងអស់ឱ្យប្រុងប្រយ័ត្នខ្ពស់បំផុតក្នុងអំឡុងពេលទស្សនាប្រាសាទអង្គរ ដោយសារឥទ្ធិពលខ្យល់ព្យុះស៊ីនឡាគូ។
តាមសេចក្តីជូនដំណឹងរបស់ក្រសួងធនធានទឹក និងឧតុនិយម ប្រទេសកម្ពុជានឹងទទួលរងឥទ្ធិពលពីខ្យល់ព្យុះទី៤ ឈ្មោះស៊ីនឡាគូ ចាប់ពីថ្ងៃទី១៤-២៥ ខែមេសា ឆ្នាំ២០២៦។ ខេត្តសៀមរាបក៏នឹងទទួលរងឥទ្ធិពលខ្លះៗផងដែរ។
អាជ្ញាធរអប្សរាបានព្រមានថា រមណីយដ្ឋានអង្គរអាចនឹងទទួលរងផលប៉ះពាល់មួយចំនួន ដែលអាចបង្កឱ្យមានភ្លៀងធ្លាក់ខ្លាំង ផ្គររន្ទះ និងខ្យល់កន្ត្រាក់។ ទាំងនេះអាចបណ្តាលឱ្យមានដីជ្រាយ ងាយរលំ ឬបាក់មែកឈើនានា ដែលអាចបង្កគ្រោះថ្នាក់ដល់សុខភាព និងអាយុជីវិត។
ក្នុងន័យនេះ អាជ្ញាធរជាតិអប្សរាសូមអំពាវនាវដល់សាធារណជន ភ្ញៀវទេសចរជាតិ-អន្តរជាតិ អ្នកបើកបរយានយន្តគ្រប់ប្រភេទ និងអ្នកដឹកភ្ញៀវទេសចរទាំងអស់ សូមមេត្តាបង្កើនការប្រុងប្រយ័ត្នឱ្យបានខ្ពស់។
សូមកុំចតយានយន្តគ្រប់ប្រភេទ ឬឈប់ជ្រកក្រោមដើមឈើ ដើម្បីបង្ការនូវហានិភ័យនានា ដែលអាចបណ្តាលឱ្យរងរបួស ខូចខាតទ្រព្យសម្បត្តិ ឬអាចឈានទៅដល់ប៉ះពាល់អាយុជីវិត។
សេចក្តីជូនដំណឹងនេះបានចេញផ្សាយនៅថ្ងៃទី១៣ ខែមេសា ឆ្នាំ២០២៦ ដោយអាជ្ញាធរជាតិអប្សរា ដើម្បីធានាសុវត្ថិភាពដល់អ្នកទស្សនា និងប្រជាពលរដ្ឋទាំងអស់។
