ចិន-តួកម៉េនីស្ថានពង្រឹងសហប្រតិបត្តិការថាមពល និងបច្ចេកវិទ្យាថ្មីៗ

អាសហ្កាបាត៖ លោក Ding Xuexiang ឧបនាយករដ្ឋមន្ត្រីចិន បានជួបសន្ទនាយុទ្ធសាស្ត្រជាមួយលោក Gurbankuly Berdymuhammedov មេដឹកនាំជនជាតិតួកម៉េនីស្ថាន នៅទីក្រុងអាសហ្កាបាត កាលពីថ្ងៃទី១៥ មេសា។

ក្នុងកិច្ចជួបនេះ លោក Ding Xuexiang បានសង្កត់ធ្ងន់ថា ទំនាក់ទំនងចិន-តួកម៉េនីស្ថាន បានរីកចម្រើនយ៉ាងឆាប់រហ័សក្រោមការដឹកនាំយុទ្ធសាស្ត្ររបស់លោក Xi Jinping ប្រធានរដ្ឋចិន និងលោក Berdymuhammedov។ កិច្ចសហប្រតិបត្តិការផ្នែកឧស្ម័នធម្មជាតិត្រូវបានចាត់ទុកជាគំរូល្អនៃទំនាក់ទំនងឈ្នះ-ឈ្នះរវាងប្រទេសទាំងពីរ។

លោក Ding បានលើកឡើងថា៖ “ភាគីទាំងពីរគួរពង្រឹងកិច្ចសហប្រត្តិបត្តិការផ្នែកឧស្ម័នធម្មជាតិតាមរយៈចក្ខុវិស័យយុទ្ធសាស្ត្រ ពន្លឿនការកសាងគម្រោងសំខាន់ៗ និងពង្រីកទំហំសហប្រតិបត្តិការថាមពល។ យើងក៏គួរបង្កើនកិច្ចសហការក្នុងវិស័យថាមពលសូឡា ថាមពលវាយោអគ្គិសនី រថយន្តអគ្គិសនី និងបញ្ញាសិប្បនិម្មិតផងដែរ។”

ឆ្លើយតបវិញ លោក Gurbankuly Berdymuhammedov បានថ្លែងថា៖ “ដំណើរទស្សនកិច្ចរបស់ខ្ញុំនៅចិនកាលពីខែមីនាកន្លងទៅ បានទទួលលទ្ធផលជាក់ស្ដែង និងបន្សល់ទុកនូវអនុស្សាវរីយ៍ល្អ។ តួកម៉េនីស្ថានគោរពគោលការណ៍ចិនមួយ ហើយមានឆន្ទៈពង្រឹងការតភ្ជាប់យុទ្ធសាស្ត្រអភិវឌ្ឍន៍ជាមួយចិន ដើម្បីពង្រីកសហប្រតិបត្តិការថាមពល។”

លោកបានបន្តថា តួកម៉េនីស្ថានមានឆន្ទៈធ្វើការជាមួយចិន ដើម្បីគាំពារសន្តិភាព ស្ថិរភាពក្នុងតំបន់ និងនៅលើពិភពលោកទាំងមូល។

កិច្ចជួបនេះបានបង្ហាញពីការពង្រឹងទំនាក់ទំនងយុទ្ធសាស្ត្ររវាងប្រទេសទាំងពីរ ជាពិសេសក្នុងវិស័យថាមពល និងបច្ចេកវិទ្យាទំនើបៗ ដែលនឹងជួយជំរុញការអភិវឌ្ឍន៍សេដ្ឋកិច្ចរបស់ប្រទេសទាំងពីរ។

ប្រភព៖ (CCFR)