By 
ទីក្រុងហ្សឺណែវ៖ អង្គការសុខភាពពិភពលោក (WHO) បានចេញសេចក្តីប្រកាសដ៏តក់ស្លុតមួយ ដោយលើកកម្រិតការផ្ទុះរាតត្បាតជំងឺអេបូឡានៅសាធារណរដ្ឋប្រជាធិបតេយ្យកុងហ្គោ និងអ៊ូហ្កង់ដា ឱ្យទៅជា «ភាពអាសន្នផ្នែកសុខភាពសាធារណៈនៃការព្រួយបារម្ភអន្តរជាតិ» (PHEIC) កាលពីថ្ងៃទី១៧ ខែឧសភា ឆ្នាំ២០២៦។
ការផ្ទុះឡើងនេះបង្កឡើងដោយវីរុសអេបូឡាអម្បូរ Bundibugyo ដែលគួរឱ្យព្រួយបារម្ភជាងពេលណាៗទាំងអស់ ដោយសារបច្ចុប្បន្ននេះ មិនទាន់មានវ៉ាក់សាំង ឬថ្នាំព្យាបាលណាមួយត្រូវបានទទួលស្គាល់សម្រាប់ព្យាបាលវីរុសប្រភេទនេះឡើយ ខុសពីអម្បូរ Zaire ដែលធ្លាប់មានវ៉ាក់សាំងការពារ។
តួលេខរាយការណ៍គិតត្រឹមចុងសប្តាហ៍នេះ បង្ហាញពីស្ថានការគួរឱ្យព្រួយបារម្ភខ្លាំង ដោយមានករណីស្លាប់សង្ស័យចំនួន ៨០ករណី ករណីបញ្ជាក់តាមមន្ទីរពិសោធន៍ ៨ករណី និងករណីឆ្លងសង្ស័យរហូតដល់ ២៤៦ករណី នៅខេត្ត Ituri របស់កុងហ្គោ។ WHO ព្រមានថា ការរាតត្បាតអាចមានទំហំធំជាងការរាយការណ៍ទៅទៀត ដោយសារអត្រាវិជ្ជមានខ្ពស់នៃសំណាក និងការកើនឡើងជាបន្តបន្ទាប់នៃករណីសង្ស័យ។
ទោះបីជាស្ថានការមិនទាន់ឈានដល់កម្រិតជំងឺរាតត្បាតសកល (Pandemic) ក៏ដោយ ក៏ប្រទេសដែលមានព្រំប្រទល់ជាប់កុងហ្គោត្រូវប្រឈមហានិភ័យខ្ពស់បំផុត។ WHO បានណែនាំឱ្យប្រទេសនានាពង្រឹងការត្រួតពិនិត្យសុខភាពតាមច្រកព្រំដែន និងដំណើរការយន្តការគ្រប់គ្រងភាពអាសន្ន ប៉ុន្តែទទូចកុំឱ្យបិទព្រំដែន ឬរឹតត្បិតការធ្វើដំណើរ ព្រោះអាចបណ្តាលឱ្យមានការឆ្លងដែនខុសច្បាប់ដោយគ្មានការតាមដាន៕
