By ខេត្តប៉ៃលិន៖ ក្នុងឱកាសបុណ្យចូលឆ្នាំថ្មីប្រពៃណីជាតិខ្មែរ ឆ្នាំ២០២៦ ភ្ញៀវទេសចរជាតិ និងអន្តរជាតិបានសម្រុកមកលេងកម្សាន្តនៅខេត្តប៉ៃលិនយ៉ាងច្រើនរហូតដល់ផ្ទះសំណាក់ និងសណ្ឋាគារគ្មានបន្ទប់ទំនេរ។
ប្រភពព័ត៌មានពីមន្ត្រីសាលាខេត្តបានឱ្យដឹងថា ចាប់តាំងពីថ្ងៃដំបូងរហូតមកដល់ថ្ងៃចុងក្រោយនេះ គ្មានថ្ងៃណាមួយថមថយនោះឡើយ គឺកាន់តែច្រើនឡើងៗ។ អ្នកខ្លះរកកន្លែងស្នាក់នៅមិនបាន ក៏នាំគ្នាទៅស្នាក់នៅផ្ទះបងប្អូនផងដែរ។
ភ្ញៀវទេសចរទាំងអស់ភាគច្រើនទៅលេងនៅរមណីយដ្ឋានទឹកធ្លាក់អូរតាវ៉ៅ ហៅទឹកធ្លាក់ភ្នំខៀវ ដែលមានចំងាយពីទីរួមខេត្តប្រមាណ៦ទៅ៧គីឡូម៉ែត្រ។ ការចុះហែលងូតទឹកលេងធ្វើឱ្យត្រជាក់កាយសប្បាយចិត្ត បំបាត់នូវទុក្ខកង្វល់។
លោកជំទាវ អភិបាលខេត្តប៉ៃលិន បានដឹកនាំការលេងល្បែងកម្សាន្តនេះផ្ទាល់ ដោយចូលរួមលេងកម្សាន្តជាមួយនឹងបងប្អូនប្រជាពលរដ្ឋ បង្កភាពសប្បាយរីករាយ។
ភ្ញៀវទេសចរម្នាក់ឈ្មោះ ប៊ុន លី មកពីខេត្តកំពង់ឆ្នាំង បានរៀបរាប់ថា៖ “លោកពិតជាមានការភ្ញាក់ផ្អើលណាស់ ខណៈឃើញថ្នាក់ដឹកនាំខេត្តមិនចេះប្រកាន់ខ្លួន ចូលរួមលេងកម្សាន្តជាមួយប្រជាពលរដ្ឋ។”
នៅវេលាម៉ោង១៤និង០០នាទីរសៀល ពិធីស្រង់ព្រះពុទ្ធបដិមាករនៅវត្តរតនសោភ័ណ ហៅវត្តកោងកាង ត្រូវបានប្រារព្ធឡើងដោយមានថ្នាក់ដឹកនាំ មន្ត្រីរាជការ ចាស់ព្រឹទ្ធាចារ្យ និងប្រជាពលរដ្ឋចូលរួមយ៉ាងច្រើន។
លោកជំទាវ អភិបាលខេត្តប៉ៃលិន ក៏សូមគោរពអញ្ចើញបងប្អូនប្រជាពលរដ្ឋទាំងអស់ និងភ្ញៀវទេសចរ ចូលរួមជួបជុំលេងល្បែងប្រជាប្រិយ និងប្រារព្ធពិធីតាមសាសនាចូលឆ្នាំប្រពៃណីខ្មែរ ពេលយប់ថ្ងៃចុងបង្ហើយ។
ខេត្តប៉ៃលិនបានទាក់ទាញភ្ញៀវទេសចរយ៉ាងច្រើនក្នុងឱកាសបុណ្យចូលឆ្នាំខ្មែរ ឆ្នាំ២០២៦ នេះ ដោយមានភ្ញៀវពីខេត្តបន្ទាយមានជ័យ ខេត្តបាត់ដំបង ខេត្តពោធិ៍សាត់ និងរាជធានីភ្នំពេញចូលមកលេងកម្សាន្ត។
