អ៊ីរ៉ង់ប្រហារជីវិតបុរសពីរនាក់ ចោទថាជាភ្នាក់ងារចារកម្មរបស់អ៊ីស្រាអែល

រាជធានីតេហេរ៉ង់ – ប្រព័ន្ធតុលាការអ៊ីរ៉ង់បានប្រហារជីវិតបុរសពីរនាក់ ដែលត្រូវបានចោទប្រកាន់ថាជាភ្នាក់ងារចារកម្មរបស់អ៊ីស្រាអែល និងធ្លាប់ទទួលការបណ្តុះបណ្តាលនៅក្រៅប្រទេស។

ទីភ្នាក់ងារព័ត៌មាន Mizan របស់ប្រព័ន្ធតុលាការអ៊ីរ៉ង់ បានរាយការណ៍ថា បុរសទាំងពីរនាក់ឈ្មោះ Mohammad Masoum Shahi និង Hamed Validi ត្រូវបានផ្តន្ទាទោសពីបទ «ប្រឆាំងនឹងព្រះជាម្ចាស់» និងការចូលដៃជាមួយក្រុមសត្រូវ។ ពួកគេត្រូវបានចោទថាជាសមាជិកនៃបណ្តាញចារកម្ម Mossad របស់អ៊ីស្រាអែល។

យោងតាមការផ្សាយរបស់ Times of Israel នាថ្ងៃទី២០ ខែមេសា ឆ្នាំ២០២៦ ការប្រហារជីវិតនេះគឺជាករណីចុងក្រោយបំផុតក្នុងចំណោមការប្រហារជីវិតជាបន្តបន្ទាប់ ចាប់តាំងពីសង្រ្គាមរវាងអ៊ីរ៉ង់ ជាមួយសហរដ្ឋអាមេរិក និងអ៊ីស្រាអែល បានផ្ទុះឡើងកាលពីចុងខែកុម្ភៈកន្លងទៅ។

បើទោះបីជាបច្ចុប្បន្នមានបទឈប់បាញ់បណ្តោះអាសន្នរយៈពេលពីរសប្តាហ៍ក៏ដោយ ក៏ប្រព័ន្ធតុលាការអ៊ីរ៉ង់នៅតែបន្តអនុវត្តច្បាប់យ៉ាងតឹងរ៉ឹងបំផុតទៅលើបុគ្គលដែលខ្លួនចាត់ទុកថាជាភ្នាក់ងាររបស់សត្រូវ។

យោងតាមក្រុមសិទ្ធិមនុស្សអន្តរជាតិ អ៊ីរ៉ង់គឺជាប្រទេសដែលប្រហារជីវិតមនុស្សច្រើនជាងគេបំផុតលំដាប់ទីពីរនៅលើពិភពលោក បន្ទាប់ពីប្រទេសចិន។ ចាប់តាំងពីសង្រ្គាមបានចាប់ផ្តើមមក មេដឹកនាំប្រព័ន្ធតុលាការអ៊ីរ៉ង់បានជំរុញឲ្យតុលាការទាំងអស់ពន្លឿនការចេញសាលក្រម និងការកាត់ទោសប្រហារជីវិត។

អង្គការលើកលែងទោសអន្តរជាតិ បានរិះគន់ថា ការប្រហារជីវិតទាំងនេះគឺជាការសងសឹករបស់របបដឹកនាំអ៊ីរ៉ង់ទៅលើអ្នកប្រឆាំង ខណៈដែលស្ថានការណ៍ក្នុងប្រទេសកំពុងស្ថិតក្នុងភាពមិនច្បាស់លាស់ដោយសារតែឥទ្ធិពលនៃសង្រ្គាម និងការបាត់បង់មេដឹកនាំកំពូលកាលពីពេលថ្មីៗនេះ។