ស្ត្រីខេត្តកោះកុងវាយប្តីស្លាប់ក្នុងអំពើហិង្សាគ្រួសារ

ខេត្តកោះកុង៖ ស្ត្រីម្នាក់នៅស្រុកបូទុមសាគរត្រូវបានចាប់ខ្លួនក្រោយពីប្រើដំបងឈើវាយប្តីបណ្តាលឱ្យបាត់បង់ជីវិត ដោយសារការឈ្លោះប្រកែកគ្នាក្នុងគ្រួសារ។

ព្រឹត្តិការណ៍នេះកើតឡើងនៅថ្ងៃទី១៩ ខែមេសា ឆ្នាំ២០២៦ វេលាម៉ោង ១៧:៥០នាទី នៅភូមិថ្មស ឃុំថ្មស ស្រុកបូទុមសាគរ។ ស្ត្រីឈ្មោះ កៅ នេម បានវាយប្តីរបស់នាងឈ្មោះ ខឹម ណេង ដោយប្រើដំបងឈើ បណ្តាលឱ្យបុរសនោះស្លាប់នៅពាក់កណ្តាលផ្លូវដែលកំពុងត្រូវបញ្ជូនទៅពេទ្យភ្នំពេញ។

តាមការអះអាងពីមន្ត្រីនគរបាល ករណីនេះចាប់ផ្តើមពីការឈ្លោះគ្នារវាងប្តីប្រពន្ធ ដោយសារប្តីស្រវឹងស្រា។ ប្តីបានយកដំបងឈើវាយប្រពន្ធមុនម្តង បណ្តាលឱ្យបែកក្បាល បន្ទាប់មកប្រពន្ធបានដណ្តើមដំបងមកវិញ ហើយវាយតបវិញចំក្បាលប្តីចំនួនពីរដង។

បន្ទាប់ពីឃើញប្តីសន្លប់ ប្រពន្ធបានហៅអ្នកជិតខាងជួយដឹកជញ្ជូនទៅមណ្ឌលសុខភាព ប៉ុន្តែដោយសាររបួសធ្ងន់ធ្ងរ គ្រូពេទ្យបានបញ្ជូនទៅភ្នំពេញបន្តការព្យាបាល។ ទោះជាយ៉ាងណា បុរសនោះមិនទាន់ទៅដល់រាជធានីក៏បានស្លាប់បាត់ជីវិត។

សពត្រូវបានក្រុមគ្រួសារយកទៅធ្វើបុណ្យតាមប្រពៃណី ចំណែកស្ត្រីជាប្រពន្ធត្រូវបាននគរបាលស្រុកបូទុមសាគរចាប់ខ្លួន និងកសាងសំណុំរឿងបញ្ជូនទៅស្នងការដ្ឋាននគរបាលខេត្តកោះកុង ដើម្បីចាត់វិធានការតាមផ្លូវច្បាប់។