រោងចក្រស្លមាសទី៣ នៅកម្ពុជា បានចាប់ផ្តើមបើកដំណើរការជាផ្លូវការនៅខេត្តកំពង់ធំ

រោងចក្រស្លមាសទី៣ នៅកម្ពុជា របស់ក្រុមហ៊ុន CAMBODIAN K88 INDUSTRY បានចាប់ផ្តើមបើកដំណើរការខ្សែសង្វាក់ផលិតកម្មជាផ្លូវការនាព្រឹកថ្ងៃទី២២ ខែមេសា ឆ្នាំ២០២៦នេះ។ រោងចក្រនេះមានទីតាំងស្ថិតនៅតំបន់ស្មងអន ស្រុកសណ្តាន់ ខេត្តកំពង់ធំ និងស្រុកសំបូរ ខេត្តក្រចេះ។

ការបើកដំណើរការនេះធ្វើឡើងក្រោមអធិបតីភាពលោក កែវ រតនៈ រដ្ឋមន្ត្រីក្រសួងរ៉ែ និងថាមពល។ នេះជាការវិនិយោគសំខាន់មួយក្នុងវិស័យឧស្សាហកម្មរ៉ែនៅកម្ពុជា។

បច្ចុប្បន្នកម្ពុជាមានរោងចក្រចម្រាញ់រ៉ែមាសសំខាន់ៗពីរកំពុងដំណើរការ៖ រោងចក្រមួយស្ថិតនៅតំបន់អូរខ្វាវ ស្រុកកែវសីមា ខេត្តមណ្ឌលគិរី របស់ក្រុមហ៊ុន Renaissance Minerals (Cambodia) Limited ដែលបានចាប់ផ្តើមផលិតកម្មនៅឆ្នាំ២០២១។

រោងចក្រមួយទៀតគឺនៅតំបន់ខ្លិខ្លក់ ស្រុកសំបូរ ខេត្តក្រចេះ របស់ក្រុមហ៊ុន Xing Yuan Kanng Yeak Co., Ltd ដែលបានដំណើរការស្លរ៉ែមាសជាលើកដំបូងនៅឆ្នាំ២០២២។

រោងចក្រស្លមាសទី៣នេះត្រូវបានគេរំពឹងថានឹងជំរុញការអភិវឌ្ឍន៍សេដ្ឋកិច្ចក្នុងតំបន់ និងបង្កើតការងារជាច្រើនសម្រាប់ប្រជាពលរដ្ឋក្នុងស្រុក។

ដោយ៖ តារា