By 
ដើម្បីការពារសន្តិសុខសណ្តាប់ធ្នាប់ និងអនុវត្តវិធានការរបស់រាជរដ្ឋាភិបាលកម្ពុជា លោកស្រី បាន ស្រីមុំ អភិបាលខេត្តប៉ៃលិន បានដាក់បទបញ្ជាម៉ឺងម៉ាត់ឲ្យកងកម្លាំងសមត្ថកិច្ចចម្រុះបន្តបេសកកម្មត្រួតពិនិត្យតាមដងផ្លូវជាតិសំខាន់ៗ។
កិច្ចប្រតិបត្តិការនេះផ្តោតលើការត្រួតពិនិត្យគ្រប់គ្រងទប់ស្កាត់ជនបរទេសខុសច្បាប់ ជាពិសេសការលួចបង្កប់បទល្មើសបច្ចេកវិទ្យា (Online Scam) តាមផ្លូវជាតិលេខ ៥៧ និងផ្លូវជាតិលេខ ៥៩។
លោកស្រីអភិបាលខេត្តបញ្ជាក់ថា គោលបំណងគឺត្រួតពិនិត្យនិងគ្រប់គ្រងជនបរទេសដែលចូលមកស្នាក់នៅឬធ្វើការដោយខុសច្បាប់ក្នុងភូមិសាស្ត្រខេត្តប៉ៃលិន។ ការបង្ក្រាបបទល្មើសរួមមានការទប់ស្កាត់ការជួញដូរមនុស្ស ការលួចឆ្លងដែនខុសច្បាប់ និងបទល្មើសគ្រឿងញៀនតាមព្រំដែន។
សមត្ថកិច្ចបានធ្វើការពិនិត្យឯកសារពាក់ព័ន្ធដូចជាលិខិតឆ្លងដែន ទិដ្ឋាការ និងប័ណ្ណស្នាក់នៅរបស់ជនបរទេសគ្រប់រូប ដើម្បីធានាថាពួកគេគោរពតាមច្បាប់ស្តីពីអន្តោប្រវេសន៍។
លោកស្រី បាន ស្រីមុំ ក៏បានសង្កត់ធ្ងន់ឲ្យកងកម្លាំងអនុវត្តច្បាប់ប្រកាន់ខ្ជាប់នូវក្រមសីលធម៌វិជ្ជាជីវៈ និងអនុវត្តការងារដោយតម្លាភាព។ ទន្ទឹមនឹងនោះ លោកស្រីបានអំពាវនាវដល់ម្ចាស់ផ្ទះសំណាក់ សណ្ឋាគារ និងម្ចាស់អាជីវកម្មនានាក្នុងខេត្តប៉ៃលិន ត្រូវសហការរាយការណ៍ជាបន្ទាន់ដល់សមត្ថកិច្ចប្រសិនបើឃើញមានវត្តមានជនបរទេសសង្ស័យគ្មានឯកសារត្រឹមត្រូវ។
សកម្មភាពនេះសបញ្ជាក់ពីការប្តេជ្ញាចិត្តរបស់រដ្ឋបាលខេត្តប៉ៃលិនក្នុងការអនុវត្តតាមគោលការណ៍ណែនាំរបស់រាជរដ្ឋាភិបាលកម្ពុជា ដើម្បីលុបបំបាត់បទល្មើសគ្រប់ប្រភេទឲ្យអស់ពីទឹកដីកម្ពុជា។
