ណាតូប្តេជ្ញាការពារតួកគីគ្រប់កាលៈទេសៈ ក្រោយស្ទាក់មីស៊ីលអ៊ីរ៉ង់បាន៤គ្រាប់

អគ្គលេខាធិការអង្គការណាតូ លោក Mark Rutte បានចេញមុខប្រកាសយ៉ាងម៉ឺងម៉ាត់ថា ណាតូនឹងធ្វើអ្វីគ្រប់យ៉ាងដែលចាំបាច់ ដើម្បីការពារសមាជិករបស់ខ្លួន ជាពិសេសតួកគី បន្ទាប់ពីមានករណីស្ទាក់ចាប់មីស៊ីលផ្លោងចំនួន៤គ្រាប់ ដែលបាញ់ចេញពីអ៊ីរ៉ង់ចូលដែនអាកាសតួកគី។

ថ្លែងក្នុងដំណើរទស្សនកិច្ចទៅកាន់ក្រុមហ៊ុនអេឡិចត្រូនិកការពារជាតិ Aselsan របស់តួកគី លោក Rutte បានបញ្ជាក់ថា៖ «អ៊ីរ៉ង់កំពុងរីករាលដាលភេរវកម្ម និងភាពវឹកវរ ហើយអ្នកមានអារម្មណ៍បែបនេះយ៉ាងច្បាស់នៅទីនេះក្នុងប្រទេសតួកគី»។

លោកបានបន្ថែមទៀតថា ការស្ទាក់មីស៊ីលផ្លោងទាំង៤លើកនេះ បង្ហាញពីការត្រៀមខ្លួនរបស់ណាតូ ហើយណាតូនឹងបន្តការពារសមាជិកទាំងអស់ដោយមិនអាចធ្វើតែម្នាក់ឯងបានឡើយ។ ដំណើរទស្សនកិច្ចនេះធ្វើឡើងមុនកិច្ចប្រជុំកំពូលមេដឹកនាំណាតូនៅទីក្រុងអង់ការ៉ានាខែកក្កដាខាងមុខ។

លោក Rutte ក៏បានសរសើរពីវឌ្ឍនភាពរបស់តួកគីក្នុងវិស័យការពារជាតិ ដោយលើកឡើងថា ពិភពលោកកាន់តែមានគ្រោះថ្នាក់ ហើយត្រូវការការពារដ៏រឹងមាំបន្ថែមទៀត។