By អន្តរជាតិ៖ លោក Wang Yi សមាជិកការិយាល័យនយោបាយនៃគណៈកម្មាធិការមជ្ឈិមបក្សកុម្មុយនីស្តចិន និងជារដ្ឋមន្ត្រីការបរទេសចិន បានជួបពិភាក្សាការងារដ៏សំខាន់មួយជាមួយលោក Tin Maung Swe រដ្ឋមន្ត្រីការបរទេសមីយ៉ាន់ម៉ា នៅរដ្ឋធានី Naypyidaw កាលពីថ្ងៃទី២៥ ខែមេសា ក្នុងគោលបំណងពង្រឹងចំណងមិត្តភាព និងកិច្ចសហប្រតិបត្តិការរវាងប្រទេសទាំងពីរ។
លោក Wang Yi បានថ្លែងថា ការបំពេញទស្សនកិច្ចនៅប្រទេសមីយ៉ាន់ម៉ានាពេលនេះ គឺធ្វើឡើងខណៈពេលដែលរដ្ឋាភិបាលមីយ៉ាន់ម៉ាថ្មីទើបបង្កើតឡើង និងចាប់ផ្តើមដំណើរការអភិវឌ្ឍន៍ដំណាក់កាលថ្មីរបស់ប្រទេស ដែលបង្ហាញយ៉ាងច្បាស់ពីការយកចិត្តទុកដាក់ខ្ពស់របស់ចិនចំពោះការពង្រឹងទំនាក់ទំនងទ្វេភាគី។ លោកបានបញ្ជាក់ថា ប្រទេសចិនជាមិត្តល្អ និងជាដៃគូដែលគួរឱ្យទុកចិត្តបានរបស់មីយ៉ាន់ម៉ាគ្រប់កាលៈទេសៈ។
ថ្នាក់ដឹកនាំចិនបានសម្តែងនូវឆន្ទៈក្នុងការរក្សាការផ្លាស់ប្តូរជាន់ខ្ពស់ ធ្វើឱ្យស៊ីជម្រៅនូវកិច្ចសហប្រតិបត្តិការជាក់ស្តែង និងជួយមីយ៉ាន់ម៉ាពន្លឿនការអភិវឌ្ឍ និងការស្តារឡើងវិញ ដើម្បីជំរុញឱ្យការកសាងសហគមន៍ជោគវាសនារួមចិន-មីយ៉ាន់ម៉ាទទួលបានសមិទ្ធផលថ្មីៗ និងផ្តល់ផលប្រយោជន៍ជូនប្រជាជនមីយ៉ាន់ម៉ាកាន់តែច្រើនថែមទៀត។
ជាការឆ្លើយតប លោក Tin Maung Swe បានថ្លែងថា មីយ៉ាន់ម៉ាប្រកាន់ខ្ជាប់យ៉ាងមុតមាំនូវគោលការណ៍ចិនមួយ ហើយមានឆន្ទៈពន្លឿនការកសាងគម្រោងនានាក្រោមក្របខ័ណ្ឌនៃច្រករបៀងសេដ្ឋកិច្ច ពង្រឹងកិច្ចសហប្រតិបត្តិការគ្រប់វិស័យ និងពួតដៃគ្នាកសាងសហគមន៍ជោគវាសនារួមមីយ៉ាន់ម៉ា-ចិន។ ប្រភព៖ (CCFR)
