By ក្រុមកាំភ្លើងធំ Arsenal កំពុងដើរលើផ្លូវសរសៃពួរក្នុងការប្រយុទ្ធដណ្ដើមពានរង្វាន់ Premier League ជាលើកដំបូងក្នុងរយៈពេលជាង ២ ទសវត្សរ៍។ មុនពេលការប្រកួតនៅថ្ងៃសៅរ៍នេះ លោក Mikel Arteta គ្រូបង្វឹកសញ្ជាតិអេស្ប៉ាញ បានអំពាវនាវដល់កីឡាកររបស់គាត់ឱ្យផ្ដោតការយកចិត្តទុកដាក់ជាថ្មី បន្ទាប់ពីត្រូវបានបញ្ចប់ដោយលទ្ធផលស្មើ 1-1 នៅលើទឹកដី Atletico Madrid ក្នុងក្របខណ្ឌ Champions League។
លោក Arteta បានថ្លែងកាលពីថ្ងៃសុក្រថា៖ «ផ្ដោតលើ Fulham ហើយស្រេកឃ្លានចង់លេង ស្រេកឃ្លានការប្រកួត ស្រេកឃ្លានចង់ឈ្នះ ស្រេកឃ្លានដើម្បីខិតទៅជិតសម្រេចក្ដីសុបិនរបស់យើង»។ គាត់បន្ថែមទៀតថា៖ «យើងនឹងលេងដើម្បីឈ្នះ Premier League។ វាជាទិសដៅដែលយើងចង់ទៅ។ ៤ ប្រកួតដែលត្រូវទៅ។ វាជាការប្រកួតទី ២។ ត្រៀមខ្លួនរួចរាល់ហើយ»។
ការតស៊ូរបស់ Arsenal ដើម្បីដណ្ដើមពានដំបូងតាំងពីឆ្នាំ 2003-04 បានឈានមកដល់វគ្គផ្ដាច់ព្រ័ត្រដ៏តានតឹង។ ក្រោយពីបាននាំមុខគេក្នុងយុទ្ធនាការជាច្រើន ការធ្លាក់ពិន្ទុម្ដងម្កាលបានអនុញ្ញាតឱ្យក្រុម Manchester City របស់លោក Pep Guardiola បិទគម្លាត ដោយដាក់សម្ពាធយ៉ាងខ្លាំងតាមរយៈការឈ្នះច្រើនជាប់គ្នានាចុងរដូវកាល។
បច្ចុប្បន្ននេះ គម្លាតរវាងក្រុមកំពូលតារាង Arsenal និងក្រុមលេខ ២ Man City មានត្រឹម ៣ ពិន្ទុប៉ុណ្ណោះ ដោយ City នៅមានមួយប្រកួតក្នុងដៃ ដែលធ្វើឱ្យរាល់ការប្រកួតសុទ្ធតែមានសារៈសំខាន់បំផុត។
នៅផ្នែកម្ខាងទៀត ក្រុម Fulham ដែលឈរនៅលេខរៀងទី ១០ មាន ៤៨ ពិន្ទុ តាមពីក្រោយក្រុម Brighton លេខ ៦ ត្រឹម ២ ពិន្ទុ ខណៈដែលការប្រកួតប្រជែងសម្រាប់កៅអីអឺរ៉ុបក៏កាន់តែក្ដៅគគុកផងដែរ។ ការប្រកួតនៅថ្ងៃសៅរ៍នេះនឹងជាឱកាសដ៏សំខាន់សម្រាប់ Arsenal ក្នុងការរក្សាសម្ពាធលើ City និងបន្តក្ដីសុបិនដណ្ដើមមកុដ Premier League ឡើងវិញ៕
