By ទីក្រុងតេអេរ៉ង់៖ រដ្ឋាភិបាលអ៊ីរ៉ង់បានផ្ញើសំណើថ្មីមួយទៀតទៅកាន់អាមេរិកតាមរយៈប៉ាគីស្ថានដែលជាអន្តរការី ដើម្បីជំរុញការចរចាឱ្យឈានដល់ការបញ្ចប់សង្គ្រាម។ នេះបើយោងតាមទីភ្នាក់ងារព័ត៌មាន IRNA ។
ទីភ្នាក់ងារនេះមិនបានបញ្ចេញព័ត៌មានលម្អិតពីសំណើនោះទេ ប៉ុន្តែក្រោយពេលផ្សព្វផ្សាយភ្លាម តម្លៃប្រេងឆៅលើទីផ្សារអន្តរជាតិបានធ្លាក់ចុះភ្លាមៗ។ គេមិនទាន់ដឹងថាសំណើនេះបានទៅដល់វ៉ាស៊ីនតោនហើយឬនៅទេ។
ពីមុននេះ ប្រេងឆៅឡើងថ្លៃខ្លាំងក្រោយមានរបាយការណ៍ថា លោកត្រាំត្រៀមកោះប្រជុំដើម្បីកំណត់វិធានការយោធាបង្ខំអ៊ីរ៉ង់ឱ្យចូលតុចរចា។ ដោយសារដំណឹងនេះ អ៊ីរ៉ង់ក៏ចាប់ផ្ដើមដាក់ដំណើរការប្រព័ន្ធការពារដែនអាកាស និងត្រៀមផែនការឆ្លើយតបវិញ បើត្រូវវាយប្រហារ។
លោកត្រាំធ្លាប់ថ្លែងថាលោកមិនសប្បាយចិត្តនឹងសំណើមុនរបស់អ៊ីរ៉ង់ដែលទាមទារឱ្យអាមេរិកបិទបញ្ចប់ការបិទខ្ទប់ដែនសមុទ្រ និងស្នើចរចាបញ្ហានុយក្លេអ៊ែរនៅពេលក្រោយ។ អ៊ីរ៉ង់ចង់បានកិច្ចព្រមព្រៀងសន្តិភាពជាមុនសិន។
អ្នកនាំពាក្យក្រសួងការបរទេសអ៊ីរ៉ង់យល់ថាមិនគួររំពឹងខ្ពស់ពេកទេថាការចរចានឹងទទួលលទ្ធផលឆាប់ៗ។ មន្ត្រីជាន់ខ្ពស់ឆ្មាំបដិវត្តឥស្លាមព្រមានថា អ៊ីរ៉ង់ត្រៀមកម្លាំងវាយអាមេរិកវិញ បើត្រូវវាយប្រហារ ដោយពណ៌នាថាជា «ការវាយប្រហាររយៈពេលយូរ និងគួរឱ្យឈឺចុកចាប់»៕
