វៀតណាមដឹកនាំកិច្ចប្រជុំមិនចូលបក្សសម្ព័ន្ធ ជំរុញសាមគ្គីភាពអន្តរជាតិគាំទ្រគុយបា ខណៈត្រាំគំរាមដាក់នាវាចម្បាំង

នៅថ្ងៃទី 1 ខែឧសភា កិច្ចប្រជុំកម្រិតឯកអគ្គរដ្ឋទូតធម្មតានៃចលនាមិនចូលបក្សសម្ព័ន្ធ (NAM) ត្រូវបានធ្វើឡើងនៅទីស្នាក់ការកណ្តាលអង្គការសហប្រជាជាតិ ក្នុងទីក្រុងញូវយ៉ក ដោយមានការចូលរួមពីសមាជិកជាច្រើនប្រទេស។

កិច្ចប្រជុំនេះផ្តោតលើការស្តាប់ព័ត៌មានថ្មីៗ និងការផ្លាស់ប្តូរទស្សនៈលើដំណើរការសំខាន់ៗរបស់ NAM និងអង្គការសហប្រជាជាតិ រួមទាំងការរៀបចំសម្រាប់កិច្ចប្រជុំកំពូល NAM លើកទី 20 ដំណើរការកសាងអនុសញ្ញាអន្តរជាតិស្តីពីសិទ្ធិក្នុងការអភិវឌ្ឍ និងសន្និសីទពិនិត្យឡើងវិញលើកទី 11 នៃសន្ធិសញ្ញាមិនរីកសាយភាយអាវុធនុយក្លេអ៊ែរ (NPT)។

នៅក្នុងកិច្ចប្រជុំនេះ វៀតណាមបានអំពាវនាវឱ្យមានសាមគ្គីភាពអន្តរជាតិក្នុងការគាំទ្រប្រទេសគុយបា ដែលកំពុងប្រឈមមុខនឹងសម្ពាធយ៉ាងធ្ងន់ធ្ងរពីសហរដ្ឋអាមេរិក។ លោកឯកអគ្គរដ្ឋទូត Ernesto Soberón ប្រធានបេសកកម្មអចិន្ត្រៃយ៍របស់គុយបាប្រចាំអង្គការសហប្រជាជាតិ បានផ្តល់ព័ត៌មានថ្មីៗអំពីការបន្តរឹតបន្តឹងទណ្ឌកម្មរបស់សហរដ្ឋអាមេរិក ជាពិសេសលើវិស័យថាមពល ពាណិជ្ជកម្ម និងទេសចរណ៍ ដែលកំពុងប៉ះពាល់យ៉ាងធ្ងន់ធ្ងរដល់សេដ្ឋកិច្ច និងជីវភាពប្រជាជនគុយបា ជាពិសេសផ្នែកម្ហូបអាហារ និងសុខភាព។

ស្របពេលជាមួយគ្នានេះ ប្រធានាធិបតីអាមេរិក លោក ដូណាល់ ត្រាំ កាលពីថ្ងៃទី 1 ខែឧសភា ឆ្នាំ 2026 បានថ្លែងនៅក្នុងព្រឹត្តិការណ៍មួយនៅរដ្ឋ Florida ថា សហរដ្ឋអាមេរិកនឹងគ្រប់គ្រងគុយបាក្នុងពេលឆាប់ៗ ដោយលើកឡើងពីលទ្ធភាពនៃការដាក់ពង្រាយនាវាផ្ទុកយន្តហោះចម្បាំង USS Abraham Lincoln ទៅកាន់ដែនទឹកជិតគុយបា ដើម្បីបង្ខំឱ្យគុយបាចុះចាញ់។

លោក ត្រាំ បានបញ្ជាក់ថា សហរដ្ឋអាមេរិកនឹងដោះស្រាយជាមួយគុយបា ក្រោយបញ្ចប់សង្គ្រាមជាមួយអ៊ីរ៉ង់ ដោយអះអាងថាគ្រាន់តែបង្ហាញសាច់ដុំយោធាក៏អាចធ្វើឱ្យគុយបាសុំចុះចាញ់ដែរ។ ក្នុងឱកាសដដែល លោក ត្រាំ ក៏បានចុះហត្ថលេខាលើបទបញ្ជាប្រតិបត្តិដាក់ទណ្ឌកម្មបន្ថែមលើបុគ្គល និងអង្គភាពដែលមានទំនាក់ទំនងជាមួយគុយបា។

គុយបាបានថ្កោលទោសទណ្ឌកម្ម និងការគំរាមកំហែងរបស់សហរដ្ឋអាមេរិក ដោយប្រកាសថានឹងមិនចុះញ៉មនឹងការសម្លុតគំរាមឡើយ។