៧ឆ្នាំក្រោយ! សហរដ្ឋអាមេរិកស្ដារសេវាកម្មហោះហើរពាណិជ្ជកម្មទៅវេណេស៊ុយអេឡាឡើងវិញ

សេវាកម្មអាកាសចរណ៍ដឹកអ្នកដំណើររបស់សហរដ្ឋអាមេរិកទៅកាន់ប្រទេសវេណេស៊ុយអេឡាបានចាប់ផ្តើមឡើងវិញជាផ្លូវការនៅព្រឹកថ្ងៃទី៣០ ខែមេសា បន្ទាប់ពីការផ្អាករយៈពេល ៧ឆ្នាំ ដោយជើងហោះហើរដំបូងរបស់ក្រុមហ៊ុន American Airlines ចេញពីទីក្រុងម៉ៃអាមីទៅកាន់ទីក្រុងការ៉ាកាស។

ក្រុមហ៊ុនអាកាសចរណ៍អាមេរិកកំពុងស្តារជើងហោះហើរប្រចាំថ្ងៃឡើងវិញ ដោយប្រើប្រាស់យន្តហោះ Embraer 175 តាមរយៈ Envoy ដែលជាក្រុមហ៊ុនបុត្រសម្ព័ន្ធ និងមានគម្រោងបន្ថែមជើងហោះហើរទីពីរចាប់ពីថ្ងៃទី២១ ខែឧសភា។ ជើងហោះហើរដំបូងដែលដឹកមន្ត្រីរដ្ឋាភិបាល និងអ្នកសារព័ត៌មាន បានចុះចតនៅរសៀលថ្ងៃដដែល។

ក្រសួងដឹកជញ្ជូនសហរដ្ឋអាមេរិកបានលុបចោលបទបញ្ជាឆ្នាំ២០១៩ ដែលហាមឃាត់ក្រុមហ៊ុនអាមេរិកហោះហើរទៅកាន់ប្រទេសវេណេស៊ុយអេឡា បន្ទាប់ពីការណែនាំរបស់អតីតប្រធានាធិបតី ដូណាល់ ត្រាំ។ នៅខែមីនា ក្រសួងបានអនុម័តសំណើរបស់ American Airlines ក្នុងការបន្តជើងហោះហើរ។

ថ្លែងក្នុងព្រឹត្តិការណ៍ស្វាគមន៍នៅអាកាសយានដ្ឋាន Maiquetía ជិតទីក្រុង Caracas រដ្ឋមន្ត្រីក្រសួងដឹកជញ្ជូនវេណេស៊ុយអេឡា លោកស្រី Jacqueline Faria បានមានប្រសាសន៍ថា៖ «សម្រាប់ប្រទេសវេណេស៊ុយអេឡា យើងមានសេចក្តីសោមនស្សរីករាយក្នុងការស្វាគមន៍ជើងហោះហើរទាំងនេះ ពីព្រោះវាមានន័យថាការតភ្ជាប់ ការអភិវឌ្ឍ ផលិតភាព និងការយកចិត្តទុកដាក់ចំពោះប្រជាជន»៕