By អតីតតារាបាល់ទាត់អេស្ប៉ាញ និងក្រុម Barcelona លោក Gerard Pique ត្រូវបានសហព័ន្ធកីឡាបាល់ទាត់អេស្ប៉ាញផ្តន្ទាទោសធ្ងន់ធ្ងរ ដោយដាក់បម្រាមរយៈពេល២ខែ និងផ្អាកពីសកម្មភាពបាល់ទាត់ផ្លូវការរហូតដល់៦ប្រកួត បន្ទាប់ពីមានជម្លោះហិង្សាជាមួយអាជ្ញាកណ្តាល។
Pique ដែលបានចូលនិវត្តន៍ពីការលេងនៅឆ្នាំ 2022 និងបច្ចុប្បន្នជាសហម្ចាស់ក្លឹប FC Andorra បានប្រឈមមុខជាមួយអាជ្ញាកណ្តាលក្នុងអំឡុងពេលដែលក្រុមរបស់គាត់ចាញ់ក្រុម Albacete 1-0 កាលពីសប្តាហ៍មុន។
គណៈកម្មាធិការវិន័យបានចេញសេចក្តីថ្លែងការណ៍ថា ការហាមប្រាមរយៈពេលពីរខែរបស់ Pique គឺ «សម្រាប់ទង្វើមិនល្អជាសាធារណៈដែលធ្វើឱ្យខូចកិត្តិយសកីឡា ដោយផ្អែកលើការពិតដែលបានកត់ត្រានៅក្នុងរបាយការណ៍របស់អាជ្ញាកណ្តាល»។ ម្ចាស់ក្លឹបវ័យ 39 ឆ្នាំរូបនេះក៏ត្រូវបានគេដាក់បម្រាម 6 ប្រកួតដាច់ដោយឡែក «សម្រាប់សកម្មភាពដែលពាក់ព័ន្ធនឹងអំពើហិង្សាតិចតួចចំពោះអាជ្ញាកណ្តាល» ។
ក្រៅពី Pique បុគ្គលិកសំខាន់ៗផ្សេងទៀតរបស់ Andorra ក៏បានជាប់ទណ្ឌកម្មផងដែរ។ ប្រធានក្លឹបលោក Ferran Vilaseca ត្រូវជាប់បម្រាមរយៈពេល 4 ខែ ខណៈដែលនាយកកីឡាលោក Jaume Nogues ត្រូវបានហាមឃាត់មិនឲ្យចូលរួមក្នុងសកម្មភាពបាល់ទាត់ផងដែរ។
គួរបញ្ជាក់ថា Gerard Pique គឺជារឿងព្រេងនិទានមួយរូបក្នុងប្រវត្តិសាស្ត្របាល់ទាត់ពិភពលោក ដោយលោកធ្លាប់បានឈ្នះពានរង្វាន់ La Liga ចំនួន 9 ដង និងពានរង្វាន់ Champions League ចំនួន 3 ជាមួយក្រុម Barcelona ព្រមទាំងជាផ្នែកមួយនៃការឈ្នះពានរង្វាន់បាល់ទាត់ពិភពលោករបស់អេស្ប៉ាញ និងជើងឯកទ្វីបអឺរ៉ុបក្នុងឆ្នាំ 2010 និង 2012 ផងដែរ។
