By រាជធានីភ្នំពេញ ៖ ក្នុងឱកាសខួបទិវាពិភពលោកកាកបាទក្រហម និងអឌ្ឍចន្ទក្រហមឆ្នាំ២០២៦ ក្រុមហ៊ុន មិត្តហ្វូន បានបន្តបរិច្ចាគថវិកា ១៤០,០០០ដុល្លារ ដល់កាកបាទក្រហមកម្ពុជា និងសាខានានា បញ្ជាក់ជាថ្មីនូវការប្តេជ្ញាចិត្តដ៏យូរអង្វែងក្នុងការរួមដំណើរជាមួយសហគមន៍។
កញ្ចប់ថវិកាឧបត្ថម្ភឆ្នាំនេះរួមមាន ១០០,០០០ដុល្លារ សម្រាប់ទីស្នាក់ការកណ្តាល និង ៤០,០០០ដុល្លារ សម្រាប់សាខាខេត្តកោះកុង និងសៀមរាប ដើម្បីអនុវត្តកម្មវិធីសង្គ្រោះបន្ទាន់ និងគាំទ្រជនខ្វះខាត និងជនរងគ្រោះដោយគ្រោះធម្មជាតិ។
តាមរយៈការរួមចំណែកចុងក្រោយនេះ ថវិកាសរុបដែលក្រុមហ៊ុនបានបរិច្ចាគជូនកាកបាទក្រហមកម្ពុជា ចាប់តាំងពីឆ្នាំ២០១០ រហូតមកដល់បច្ចុប្បន្ន បានកើនឡើងលើស ៣លានដុល្លារ ជាផ្លូវការ ដែលជាតួលេខបញ្ជាក់ពីភាពរឹងមាំនៃយុទ្ធសាស្ត្រអភិវឌ្ឍន៍របស់ក្រុមហ៊ុនដែលផ្សារភ្ជាប់ជាមួយទំនួលខុសត្រូវសង្គម។
ក្រៅពីការគាំទ្រផ្នែកហិរញ្ញវត្ថុ មិត្តហ្វូន បានចូលរួមដោយផ្ទាល់ក្នុងកម្មវិធីសប្បុរសធម៌នៅទូទាំង ២៥ រាជធានី-ខេត្ត ចាប់តាំងពីការជួយសង្គ្រោះគ្រោះមហន្តរាយ ការគាំទ្រផ្នែកវេជ្ជសាស្ត្រ និងការអប់រំ រហូតដល់ការបរិច្ចាគឈាមមនុស្សធម៌ និងការជួយសម្រួលជីវភាពគ្រួសារក្រីក្រ។
តំណាងក្រុមហ៊ុន មិត្តហ្វូន បានចែករំលែកថា ក្រុមហ៊ុនជឿជាក់ថាតម្លៃនៃសហគ្រាសត្រូវបានវាស់វែងដោយការរួមចំណែកជាក់ស្តែងដល់សង្គម ហើយការធ្វើជាដៃគូជាមួយកាកបាទក្រហមកម្ពុជា គឺជាផ្នែកមួយនៃការប្តេជ្ញាចិត្តចំពោះការអភិវឌ្ឍប្រកបដោយចីរភាព។
គិតមកដល់បច្ចុប្បន្ន កញ្ចប់ថវិកាសរុបដែលក្រុមហ៊ុនបានចំណាយលើកម្មវិធីសហគមន៍ ការអប់រំ សុខាភិបាល ការគាំទ្រគ្រោះមហន្តរាយ និងការផ្លាស់ប្តូរឌីជីថលសង្គម បានកើនឡើងលើស ១២០លានដុល្លារ ដែលធ្វើឱ្យ មិត្តហ្វូន ក្លាយជាគំរូនៃអាជីវកម្មដែលបញ្ជ្រាបការរីកចម្រើនទៅជាមួយទំនួលខុសត្រូវសង្គម៕
