By ប្រព័ន្ធនយោបាយហុងគ្រីរកឃើញការផ្លាស់ប្តូរជាផ្លូវការ បន្ទាប់ពីលោក Peter Magyar អាយុ ៤៥ ឆ្នាំ បានស្បថចូលកាន់តំណែងជានាយករដ្ឋមន្ត្រីថ្មី ជំនួសលោក Viktor Orban ដែលកាន់អំណាចអស់ ១៦ ឆ្នាំ។
លោកដឹកនាំគណបក្ស Tisza កណ្តាលស្តាំនិយម មានទំនោរទៅរកសហគមន៍អឺរ៉ុប និងឈ្នះការបោះឆ្នោតដាច់លើគណបក្សលោក Orban ដោយបាន ១៤១ ក្នុងចំណោម ១៩៩ អាសនៈក្នុងសភា។
យោងតាម Al Jazeera លោក Magyar ត្រូវបានជំរុញឱ្យចូលកាន់តំណែងដោយការសន្យានៃការផ្លាស់ប្តូរ បន្ទាប់ពីសេដ្ឋកិច្ចជាប់គាំងជាច្រើនឆ្នាំក្រោមការដឹកនាំរបស់លោក Orban និងទំនាក់ទំនងតានតឹងជាមួយសហភាពអឺរ៉ុប។
ថ្លែងទៅកាន់អ្នកគាំទ្ររាប់ម៉ឺននាក់នៅខាងក្រៅសភាក្នុងថ្ងៃស្បថចូលកាន់តំណែង នាយករដ្ឋមន្ត្រីថ្មីបានពណ៌នាអំពីផ្លូវឆ្ពោះទៅរកការផ្លាស់ប្តូរថា «នៅវែងឆ្ងាយណាស់ ហើយវាមិនងាយស្រួលនោះទេ»។ នេះបើយោងតាម The Guardian។
លោកបញ្ជាក់ថា «សព្វថ្ងៃនេះ មនុស្សដែលស្រឡាញ់សេរីភាពគ្រប់រូបក្នុងពិភពលោកចង់ក្លាយជាជនជាតិហុងគ្រីបន្តិច» និង «អ្នកបានបង្រៀនពិភពលោកថា មនុស្សសាមញ្ញបំផុត អាចកម្ចាត់របបផ្តាច់ការដ៏សាហាវបំផុត»។
លោកស្រី Agnes Forsthoffer ប្រធានសភាថ្មី បានបញ្ជាឱ្យដាក់ទង់ជាតិឡើងវិញ ដោយពណ៌នាថាជា «ជំហាននិមិត្តរូបដំបូងត្រឡប់ទៅអឺរ៉ុបវិញ»។
នាយករដ្ឋមន្ត្រីថ្មីប្រឈមមុខនឹងបញ្ហាប្រឈមធំៗ រួមមានការស្តារសេដ្ឋកិច្ច ដោះស្រាយឱនភាពថវិកា និងការរំដោះមូលនិធិប្រហែល ២០ពាន់លានដុល្លារពីសហភាពអឺរ៉ុប ដែលត្រូវបានបង្កកដោយសារកង្វល់សិទ្ធិមនុស្សក្រោមរបប Orban៕
