By ក្រុងតេអេរ៉ង់៖ អ៊ីរ៉ង់បានចេញសារព្រមានយ៉ាងខ្លាំងទៅកាន់ចក្រភពអង់គ្លេស និងបារាំង កាលពីថ្ងៃអាទិត្យថា កងកម្លាំងប្រដាប់អាវុធរបស់ខ្លួននឹងឆ្លើយតបយ៉ាងម៉ឺងម៉ាត់និងភ្លាមៗ ចំពោះនាវាចម្បាំងណាមួយដែលត្រូវបានបញ្ជូនទៅកាន់ច្រកសមុទ្រហ័រមូស (Hormuz)។
ការព្រមាននេះធ្វើឡើងបន្ទាប់ពីទីក្រុងឡុងដ៍បានបញ្ជូននាវាចម្បាំងមួយគ្រឿងទៅកាន់តំបន់នេះ។ អនុរដ្ឋមន្ត្រីការបរទេសអ៊ីរ៉ង់ លោក Kazem Gharibabadi បានបង្ហោះសារនៅលើបណ្តាញសង្គម X ថា៖ «យើងសូមរំឭកពួកគេថា ទាំងក្នុងសម័យសង្គ្រាមនិងសន្តិភាព មានតែសាធារណរដ្ឋអ៊ីរ៉ង់ប៉ុណ្ណោះ ដែលអាចបង្កើតសន្តិសុខនៅក្នុងច្រកសមុទ្រនេះបាន»។
គួរបញ្ជាក់ថា ចក្រភពអង់គ្លេសនិងបារាំងកំពុងដឹកនាំកិច្ចខិតខំប្រឹងប្រែងបង្កើតសម្ព័ន្ធភាពអន្តរជាតិ ដើម្បីធានាសុវត្ថិភាពនៃច្រកសមុទ្រហ័រមូស។ ក្រសួងការពារជាតិអង់គ្លេសបានប្រកាសកាលពីថ្ងៃសៅរ៍ថា ខ្លួននឹងបញ្ជូននាវាពិឃាត HMS Dragon ទៅកាន់មជ្ឈិមបូព៌ា ដោយអះអាងថានឹងពង្រឹងទំនុកចិត្តលើការដឹកជញ្ជូនពាណិជ្ជកម្ម និងគាំទ្រការបោសសម្អាតមីន។
យ៉ាងណាវិញ ប្រធានាធិបតីបារាំង លោក Emmanuel Macron បញ្ជាក់ថា បារាំងមិនដែលគិតទុកជាមុនពីការដាក់ពង្រាយកងទ័ពជើងទឹកទេ តែវាគឺជាបេសកកម្មសន្តិសុខដែលនឹងសម្របសម្រួលជាមួយអ៊ីរ៉ង់វិញ៕
