By ក្រសួងសុខាភិបាលលីបង់បានចេញរបាយការណ៍បង្ហាញថា ក្នុងរយៈពេលត្រឹមតែ ២៤ម៉ោងប៉ុណ្ណោះ ការវាយប្រហាររបស់អ៊ីស្រាអែលនៅតំបន់ភាគខាងត្បូងលីបង់បានឆក់យកជីវិតមនុស្សរហូតដល់ ៥១នាក់ រួមទាំងបុគ្គលិកពេទ្យ ២រូបផងដែរ។ នេះបើយោងតាមការចេញផ្សាយរបស់សារព័ត៌មាន Al Jazeera នៅថ្ងៃទី ១០ ឧសភា ២០២៦។
ក្រសួងបានថ្លែងថា៖ «សត្រូវអ៊ីស្រាអែលនៅតែបន្តរំលោភច្បាប់អន្តរជាតិ និងបទដ្ឋានមនុស្សធម៌ ដោយបន្ថែមឧក្រិដ្ឋកម្មមួយទៀតប្រឆាំងនឹងគ្រូពេទ្យសង្គ្រោះបន្ទាន់ ព្រោះពួកគេបានកំណត់គោលដៅផ្ទាល់ទៅលើមូលដ្ឋានសុខាភិបាលពីរនៅតំបន់ Qalawiya និង Tibnin ស្រុក Bint Jbeil»។
គួរបញ្ជាក់ថា ទោះបីជាមានបទឈប់បាញ់ដែលសម្របសម្រួលដោយសហរដ្ឋអាមេរិកកាលពីថ្ងៃទី ១៦ ខែមេសា ឆ្នាំ ២០២៦ ក៏ដោយ ក៏អ៊ីស្រាអែលនៅតែវាយប្រហារមកលើលីបង់ស្ទើររៀងរាល់ថ្ងៃ។ ក្រសួងសុខាភិបាលលីបង់បន្ថែមថា មនុស្សចំនួន ២,៨៤៦នាក់ត្រូវបានសម្លាប់នៅទូទាំងប្រទេសចាប់តាំងពីថ្ងៃទី ២ ខែមីនា ពេលដែលកងកម្លាំងអ៊ីស្រាអែលបានចាប់ផ្តើមប្រតិបត្តិការយោធាថ្មី។
យោងតាមអង្គការសហប្រជាជាតិ (UN) បុគ្គលិកពេទ្យលីបង់យ៉ាងហោចណាស់ ១០៣នាក់ត្រូវបានសម្លាប់ និង ២៣០នាក់ផ្សេងទៀតរងរបួស ក្នុងការវាយប្រហារជាង ១៣០ដងរបស់អ៊ីស្រាអែល។ លោក Ali Safiuddin ប្រធានការពារជនស៊ីវិលលីបង់នៅទីក្រុង Tyre បានឲ្យដឹងថា៖ «យើងស្ថិតនៅក្រោមការគំរាមកំហែងរៀងរាល់វិនាទី។ យើងបាត់បង់មនុស្សជាច្រើន ហើយវាមានអារម្មណ៍ថាយើងបានបាត់បង់ទៅហើយដែរ»។
សូមបញ្ជាក់ផងដែរថា ការវាយប្រហាររបស់អ៊ីស្រាអែលបានធ្វើឲ្យប្រជាជនលីបង់ជាង ១,២លាននាក់ផ្លាស់ទីលំនៅ ចាប់តាំងពីថ្ងៃទី ២ ខែមីនា ឆ្នាំ ២០២៦។
