អាល្លឺម៉ង់-អ៊ុយក្រែន រួមដៃអភិវឌ្ឍអាវុធបច្ចេកវិទ្យាខ្ពស់ វាយប្រហារចម្ងាយឆ្ងាយ

ប្រទេសអាល្លឺម៉ង់ប្រកាសពង្រីកកិច្ចសហប្រតិបត្តិការជាមួយអ៊ុយក្រែនក្នុងការអភិវឌ្ឍអាវុធបច្ចេកវិទ្យាខ្ពស់ វាយប្រហារបានចម្ងាយឆ្ងាយ និងមានសមត្ថភាពខ្លាំងជាងមុន។

រដ្ឋមន្ត្រីក្រសួងការពារជាតិអាល្លឺម៉ង់ លោក Boris Pistorius បានថ្លែងនៅទីក្រុងគៀវថា ទីក្រុងប៊ែរឡាំងប្តេជ្ញាចិត្តក្នុងការអភិវឌ្ឍប្រព័ន្ធអាវុធថ្មីៗដោយសហការជាមួយអ៊ុយក្រែន។ លោកបញ្ជាក់ថា ការពង្រឹងកិច្ចសហប្រតិបត្តិការនេះជាផ្នែកមួយនៃភាពជាដៃគូយុទ្ធសាស្ត្រ និងជាគោលដៅសំខាន់នៃដំណើរទស្សនកិច្ច។

លោក Pistorius បានលើកឡើងថា ការផ្តោតសំខាន់គឺទៅលើការអភិវឌ្ឍរួមគ្នានៃប្រព័ន្ធដ្រូនទំនើបៗគ្រប់ចម្ងាយ ជាពិសេសក្នុងតំបន់នៃការវាយប្រហារដ៏ជ្រៅ ដែលសំដៅដល់សមត្ថភាពបំផ្លាញគោលដៅសំខាន់ៗយ៉ាងជ្រៅក្នុងទឹកដីសត្រូវ។

អ្នកវិភាគបានលើកឡើងថា ដៃគូណាតូអឺរ៉ុបមានចន្លោះប្រហោងក្នុងវិស័យអាវុធរយៈចម្ងាយឆ្ងាយ ហើយលោក Pistorius បានសង្កត់ធ្ងន់ថា ជារឿងចាំបាច់សម្រាប់រដ្ឋសមាជិកណាតូក្នុងការធ្វើសកម្មភាពយ៉ាងឆាប់រហ័ស។ រដ្ឋាភិបាលអាល្លឺម៉ង់កំពុងបន្តផែនការបណ្តាក់ទុនរួមគ្នាបន្ថែមទៀតជាមួយអ៊ុយក្រែន។

លោកបន្តថា «ក្នុងការធ្វើដូច្នេះ យើងទទួលបានអត្ថប្រយោជន៍ពីបទពិសោធន៍របស់អ៊ុយក្រែននៅលើសមរភូមិ»៕