By ក្រុងបាកដាដ៖ គិតត្រឹមខែឧសភា ឆ្នាំ២០២៦ អ៊ីរ៉ាក់កំពុងស្ថិតក្រោមសម្ពាធយ៉ាងខ្លាំង ក្រោយមានរបាយការណ៍ថា អ៊ីស្រាអែលបានសាងសង់មូលដ្ឋានទ័ពសម្ងាត់នៅវាលខ្សាច់ភាគខាងលិចរបស់ខ្លួន ដើម្បីវាយប្រហារអ៊ីរ៉ង់។ ទោះបីមន្ត្រីអ៊ីរ៉ាក់បដិសេធដំណឹងនេះក៏ដោយ ក៏ពួកគេបានរាយការណ៍ជាផ្លូវការទៅកាន់អង្គការសហប្រជាជាតិ (UN) ថា អ៊ីស្រាអែលកំពុងប្រើប្រាស់ដែនអាកាសរបស់ខ្លួន ធ្វើសកម្មភាពយោធាប្រឆាំងនឹងអ៊ីរ៉ង់។
នៅថ្ងៃទី៩ ខែឧសភា កាសែត The Wall Street Journal រាយការណ៍ថា អ៊ីស្រាអែលបានបង្កើតមូលដ្ឋានយោធាសម្ងាត់មួយនៅភាគខាងលិចអ៊ីរ៉ាក់ ដោយមានកងកម្លាំងពិសេសដាក់ពង្រាយនៅទីនោះ ដើម្បីគាំទ្រការវាយប្រហារតាមអាកាសលើអ៊ីរ៉ង់។ ប៉ុន្តែនៅថ្ងៃទី១០ ខែឧសភា មន្ត្រីសន្តិសុខជាន់ខ្ពស់អ៊ីរ៉ាក់បានប្រាប់ទីភ្នាក់ងារ Anadolu ថា របាយការណ៍នេះគឺជា «រឿងមិនពិតទាំងស្រុង»។
ទន្ទឹមនឹងនេះ ប្រភពសន្តិសុខអ៊ីរ៉ាក់បានបញ្ជាក់ថា ខណៈយោធាកំពុងស៊ើបអង្កេតឧបករណ៍រំខាន និងឧបករណ៍ព្រមានជាមុននៅវាលខ្សាច់ Najaf គ្មានមូលដ្ឋានបរទេសណាមួយត្រូវបានរកឃើញឡើយ។ ទោះជាយ៉ាងណា ពួកគេទទួលស្គាល់ថាមានឧប្បត្តិហេតុកាលពីខែមីនា ឆ្នាំ២០២៦ ដែលទាហានអ៊ីរ៉ាក់ម្នាក់ត្រូវបានសម្លាប់។
របាយការណ៍ទាំងនេះបានបង្កឱ្យមានភាពចលាចលនៅទីក្រុងបាកដាដ ជំរុញឱ្យសភាកោះហៅរដ្ឋមន្ត្រីសន្តិសុខមកសួរចម្លើយ។ ដើម្បីដោះខ្លួនពីការចោទប្រកាន់ពីភាគីអ៊ីរ៉ង់ អ៊ីរ៉ាក់បានរាយការណ៍ករណីនេះទៅ UN ជាផ្លូវការថា អ៊ីស្រាអែលរំលោភលើដែនអាកាសរបស់ខ្លួន ប៉ុន្តែនៅតែបដិសេធរាល់ការចោទប្រកាន់ពីអត្ថិភាពនៃមូលដ្ឋានសម្ងាត់នេះដដែល៕
