By ប្រធានាធិបតីរុស្ស៊ី លោក វ្ល៉ាឌីមៀរ ពូទីន បានប្រកាសដាក់ពង្រាយមីស៊ីលផ្លោងអន្តរទ្វីប Sarmat ដែលហៅថា “Satan II” នៅចុងឆ្នាំនេះ ដោយលើកឡើងថាវាជា “ប្រព័ន្ធមីស៊ីលដ៏មានឥទ្ធិពលបំផុតរបស់ពិភពលោក”។
យោងតាមទីភ្នាក់ងាររ៉យទ័រ ក្នុងកិច្ចប្រជុំតាមទូរទស្សន៍កាលពីថ្ងៃទី១២ ខែឧសភា លោក ពូទីន បានអះអាងថា ក្បាលគ្រាប់ Sarmat មានថាមពលបំផ្លិចបំផ្លាញជាងសមភាគីលោកខាងលិច ៤ ដង និងមានចម្ងាយហោះហើរលើស ៣៥,០០០ គីឡូម៉ែត្រ។ លោកសង្កត់ធ្ងន់ថា “វាអាចជ្រាបចូលប្រព័ន្ធការពារមីស៊ីលបច្ចុប្បន្ន និងអនាគតណាមួយ”។
មេបញ្ជាការកងកម្លាំងមីស៊ីលយុទ្ធសាស្ត្ររុស្ស៊ី លោក Sergey Karakayev បានរាយការណ៍ថា កងវរសេនាធំដំបូងដែលបំពាក់ដោយ Sarmat នឹងចូលបម្រើការនៅតំបន់ Krasnoyarsk ភាគខាងកើតស៊ីបេរី មុនចុងឆ្នាំនេះ។ មីស៊ីល Sarmat ត្រូវបានអភិវឌ្ឍដោយឯករាជ្យក្រោយសម័យសូវៀត ជាប្រភេទ “super-heavy” ដ៏មានឥទ្ធិពលបំផុត។
លោក ពូទីន បានប្រកាសគម្រោងនេះតាំងពីឆ្នាំ ២០១៨ ដោយអះអាងថា Sarmat ធ្វើឱ្យប្រព័ន្ធការពារមីស៊ីលអាមេរិក “គ្មានប្រសិទ្ធភាព”។ ទោះជាយ៉ាងណា កម្មវិធីនេះត្រូវបានពន្យារពេលម្តងហើយម្តងទៀត និងជួបបញ្ហាបច្ចេកទេស ដោយអ្នកជំនាញលោកខាងលិចឲ្យដឹងថា ការសាកល្បងក្នុងខែកញ្ញា ឆ្នាំ ២០២៤ បានបរាជ័យ បន្សល់ទុករណ្ដៅធំនៅកន្លែងបាញ់បង្ហោះ។
ដោយ៖ ធីរីណា
