By ខេត្តស្វាយរៀង៖ សម្តេចតេជោ ហ៊ុន សែន បានថ្លែងដោយក្តីហួសចិត្តជាខ្លាំងចំពោះមន្ត្រី ក.ប.ប ខេត្តបាត់ដំបង ដែលបានទៅកាងពួកជនខិលខូចនាំទុរេនចូលពីប្រទេសថៃ ថែមទាំងប្រកាសថាទុរេននោះជាទុរេនខេត្តកំពង់ចាមទៀតផង។
សម្តេចតេជោ ហ៊ុន សែន បានមានប្រសាសន៍ថា៖ «ហេតុអ្វីមន្ត្រីយើងទៅកាងជនខិលខូច ខណៈជនខិលខូចបានសារភាពថា បាននាំចូលពីប្រទេសថៃ។ ប្រជាពលរដ្ឋមិនទាន់អស់ចិត្តទេ ខ្ញុំក៏មិនទាន់អស់ចិត្តដែរ។ តើមន្ត្រីរូបហ្នឹងបានមានវិធានការហើយនៅ?»។
សម្តេចតេជោ បានបញ្ជាក់ថា បញ្ហានេះមិនមែនជារឿងពហិកានោះទេ តែពាក់ព័ន្ធនឹងសុខភាពរបស់ប្រជាពលរដ្ឋ។ សម្តេចបានណែនាំដល់មន្ត្រីគ្រប់រូប កុំយកគំរូតាមមន្ត្រីរូបនេះឱ្យសោះ។
ជាមួយគ្នានេះ សម្តេចតេជោ ក៏បានបញ្ជាក់ផងដែរថា សម្រាប់មន្ត្រីបែបនេះ មិនគួរចាត់វិធានការត្រឹមអនុវត្តន៍វិន័យរបស់មន្ត្រីនោះទេ គួរតែចាត់វិធានការផ្លូវច្បាប់ ដើម្បីធ្វើជាមេរៀនព្រមានដល់មន្ត្រីខិលខូចផ្សេងទៀត ដែលមិនគួរកើតមានឡើង៕
