ប្រយ័ត្នកូនអ្នក! វិធីសាស្ត្រការពារកុមារពីមាតិកាអាក្រក់លើបណ្តាញអ៊ីនធឺណិត ដែលមាតាបិតាគ្រប់រូបត្រូវតែដឹង

ភ្នំពេញ៖ អគ្គនាយកដ្ឋានបច្ចេកវិទ្យាឌីជីថល និងផ្សព្វផ្សាយអប់រំ នៃក្រសួងមហាផ្ទៃ បានចេញមកដាស់តឿនអំពីគ្រោះថ្នាក់ដែលកុមារកំពុងប្រឈមមុខនៅលើបណ្តាញអ៊ីនធឺណិត ខណៈដែលបច្ចេកវិទ្យារីកចម្រើនយ៉ាងឆាប់រហ័ស។ កុមារភាគច្រើនសុទ្ធតែធ្លាប់ជួបប្រទះមាតិកាបំពុល ដូចជាអំពើហិង្សា រូបភាពអាសអាភាស និងការគំរាមកំហែងតាមប្រព័ន្ធអ៊ីនធឺណិត (Cyberbullying) ដែលអាចប៉ះពាល់ដល់សុខភាពផ្លូវចិត្តរបស់ពួកគេ។

ជាក់ស្តែង ក្រុមការងារបច្ចេកទេសនៃអគ្គនាយកដ្ឋានបច្ចេកវិទ្យាឌីជីថល និងផ្សព្វផ្សាយអប់រំ បានលើកយកវិធីសាស្ត្រសំខាន់ៗ ដើម្បីជួយមាតាបិតា និងអាណាព្យាបាលក្នុងការការពារកូនៗពីគ្រោះថ្នាក់ទាំងនេះ។

១. ការកត់សម្គាល់លើការរិះគន់រំលោភបំពានតាមបណ្តាញ (Cyberbullying)
កូនរបស់លោកអ្នកអាចក្លាយជាជនរងគ្រោះនៃ Cyberbullying ដោយអ្នកអាចសង្កេតឃើញអាកប្បកិរិយាដូចជា ការមួម៉ៅ ស្ងៀមស្ងាត់ ឬលាក់បាំងក្រោយពេលប្រើអ៊ីនធឺណិត។ ក្នុងករណីមានការរំលោភបំពាន អាណាព្យាបាលត្រូវថតទុកជាភស្តុតាង ដើម្បីស្នើសុំដោះស្រាយឱ្យបានត្រឹមត្រូវ។

២. ការកំណត់វិន័យនៃការប្រើប្រាស់ (Setting Boundaries)
កំណត់ទីតាំងប្រើប្រាស់ឧបករណ៍បច្ចេកវិទ្យានៅកន្លែងចំហ ចៀសវាងការប្រើប្រាស់តែម្នាក់ឯងក្នុងបន្ទប់ និងកំណត់កាលវិភាគប្រើប្រាស់ឱ្យបានត្រឹមត្រូវ។

៣. ការគ្រប់គ្រងលើរបបប្រើប្រាស់ (Parental Controls)
• ប្រើកម្មវិធីដូចជា Google Family Link ឬមុខងារផ្សេងទៀត ដើម្បីកំណត់ពេលវេលាប្រើប្រាស់ និងការដំឡើងកម្មវិធី (App Setting)។
• បើកមុខងារ SafeSearch នៅលើបណ្តាញអ៊ីនធឺណិត ដើម្បីច្រោះយកមាតិកាមិនសមរម្យចេញ ឬប្រើប្រាស់កម្មវិធីសម្រាប់កុមារដូចជា YouTube Kids ជាដើម។

ការចូលរួមពីមាតាបិតាគឺជាគន្លឹះដ៏សំខាន់បំផុត ដើម្បីធានាសុវត្ថិភាពរបស់កុមារនៅក្នុងពិភពឌីជីថលនាពេលបច្ចុប្បន្ននេះ៕

ដោយ៖ តារា