By រឿងរ៉ាវរញ្ជួយពាណិជ្ជកម្ម! ក្រុមហ៊ុន Shinsegae Group ដែលគ្រប់គ្រង Starbucks នៅកូរ៉េខាងត្បូង បានសម្រេចចិត្តបណ្តេញលោក Sohn Jeong-hyun ចេញពីតំណែងជាប្រធានក្រុមហ៊ុន បន្ទាប់ពីយុទ្ធនាការ ‘Tank Day’ បង្កឱ្យមានកំហឹងយ៉ាងខ្លាំងក្លាពីសំណាក់សាធារណជន។
យុទ្ធនាការនេះបានចាប់ផ្តើមនៅថ្ងៃចន្ទ ដែលជាទិវារំលឹកដល់ការបះបោរ Gwangju ឆ្នាំ១៩៨០ ដោយប្រើពាក្យស្លោក ‘ដាក់លើតុជាមួយសំឡេង Tak!’ ដើម្បីផ្សព្វផ្សាយកែវទឹកយីហោ ‘Tank’។ ពាក្យ ‘Tank’ និង ‘Tak’ បានរំលឹកដល់រថក្រោះយោធាដែលរបប Chun Doo-hwan បញ្ជូនទៅបង្ក្រាបបាតុករនិស្សិត និងសំឡេងដែលប៉ូលិសធ្លាប់ប្រើដើម្បីបិទបាំងករណីធ្វើទារុណកម្មនិស្សិតរហូតដល់ស្លាប់ក្នុងឆ្នាំ១៩៨៧។
ប្រធានាធិបតីកូរ៉េខាងត្បូង លោក Lee Jae Myung បានសម្តែងការខឹងសម្បារយ៉ាងខ្លាំង ដោយចោទប្រកាន់ថាយុទ្ធនាការនេះ ‘បានបង្ខូចកិត្តិយសនៃការតវ៉ាដ៏បង្ហូរឈាមរបស់ប្រជាពលរដ្ឋ Gwangju’។ អតិថិជនរាប់រយនាក់បានប្រញាប់ដកប្រាក់ និងលុបសមាជិកភាព ចំណែកភាគហ៊ុន E-Mart បានធ្លាក់ចុះ 5.5%។ ទោះបីជា Starbucks Korea និងប្រធាន Shinsegae បានចេញសេចក្តីសុំទោសជាសាធារណៈក៏ដោយ ក៏មតិរិះគន់ជាង 2,800 បានលេចឡើងនៅលើបណ្តាញសង្គម។ Starbucks Global កំពុងធ្វើការស៊ើបអង្កេតបន្ថែម។
