សង្គ្រាមដ្រូន៖ អ៊ុយក្រែនវាយប្រហារកម្រិតមធ្យម ធ្វើឲ្យរុស្ស៊ីបាត់បង់សមត្ថភាពប្រយុទ្ធ

ចាប់តាំងពីការវាយប្រហារដោយដ្រូនដុតរោងចក្រចម្រាញ់ប្រេង រហូតដល់ការវាយលុកដីគោក ទីក្រុងមូស្គូកំពុងជួបបញ្ហាកាន់តែខ្លាំងលើសង្គ្រាមប្រឆាំងនឹងអ៊ុយក្រែន។ នេះដោយសារកងកម្លាំងយោធាអ៊ុយក្រែនកំពុងពង្រឹងការវាយប្រហារដោយដ្រូនចម្ងាយមធ្យម ដែលធ្វើឲ្យប៉ះពាល់យ៉ាងខ្លាំងដល់សមត្ថភាពប្រយុទ្ធរបស់រុស្ស៊ី។

យោងតាមភ្នាក់ងារសារព័ត៌មានរ៉យទ័រ ផ្សាយថ្ងៃទី១៩ ខែឧសភា ឆ្នាំ២០២៦ អ៊ុយក្រែនកំពុងកំណត់គោលដៅដែនអាកាស និងភស្តុភាររបស់រុស្ស៊ីរាប់សិបគីឡូម៉ែត្រពីក្រោយខ្សែប្រយុទ្ធជួរមុខ។ ការវាយប្រហារទាំងនេះកំពុងរំខានដល់ការឈានទៅមុខក្នុងសមរភូមិរបស់រុស្ស៊ី និងបើកផ្លូវសម្រាប់ការវាយប្រហារចម្ងាយឆ្ងាយលើកន្លែងផលិតប្រេងនិងយោធារបស់រុស្ស៊ី។ នេះបើយោងតាមមេបញ្ជាការអ៊ុយក្រែនពីរនាក់ អ្នកឯកទេសដ្រូនពីរនាក់ និងអ្នកវិភាគយោធាបីរូប។

មន្ត្រីអ៊ុយក្រែនបាននិយាយថា ធនធានកាន់តែច្រើនត្រូវបានចាក់ចូលទៅក្នុងការវាយប្រហារកម្រិតមធ្យមក្នុងរយៈពេលប៉ុន្មានខែថ្មីៗនេះ ជាធម្មតាមានចម្ងាយចន្លោះពី ៣០គីឡូម៉ែត្រ ទៅ ១៨០គីឡូម៉ែត្រនៅពីក្រោយជួរមុខ។

ប្រភពព័ត៌មានឱ្យដឹងទៀតថា ការអនុវត្តនេះអនុញ្ញាតឱ្យអ៊ុយក្រែនវាយប្រហាររ៉ាដារុស្ស៊ី ដែនអាកាសរយៈចម្ងាយខ្លី មធ្យម ហេដ្ឋារចនាសម្ព័ន្ធទំនាក់ទំនង ភស្តុភារ និងយានយន្តយោធាធំៗជម្រៅប្រតិបត្តិការ។

លោក Robert Brovdi មេបញ្ជាការកងកម្លាំងប្រព័ន្ធដ្រូនអ៊ុយក្រែននិយាយថា៖ «ដ្រូនវាយប្រហារចម្ងាយឆ្ងាយបច្ចុប្បន្ន អាចរអិលឆ្លងកាត់ការការពារបានកាន់តែងាយស្រួល ដើម្បីវាយប្រហាររោងចក្រប្រេងរបស់រុស្ស៊ីនៅឆ្ងាយពីខ្សែជួរមុខ»។

អ្នកវិភាគការពារជាតិថា ការវាយប្រហារបែបនេះតែមួយមុខមិនអាចផ្លាស់ប្តូរទិសដៅប្រឆាំងនឹងរុស្ស៊ីបានទេ ប៉ុន្តែពួកគេកំពុងប៉ះពាល់យ៉ាងខ្លាំង ហើយឥទ្ធិពលនៃសង្គ្រាមអាចនឹងផ្លាស់ប្តូរ។