សម្ដេចកិត្ដិសង្គហបណ្ឌិត ម៉ែន សំអន ទស្សនាសិល្បៈ និងពិព័រណ៍ផលិតផលនៅខេត្តស្វាយរៀង

ខេត្តស្វាយរៀង៖ សម្ដេចកិត្ដិសង្គហបណ្ឌិត ម៉ែន សំអន ឧត្តមប្រឹក្សាផ្ទាល់ព្រះមហាក្សត្រ នៃព្រះរាជាណាចក្រកម្ពុជា បានអញ្ជើញទស្សនាការសម្តែងសិល្បៈគុណល្បុកតោ និងរបាំកណ្តូបសេះ នាថ្ងៃទី១៤ មេសា ២០២៦។ កម្មវិធីនេះរៀបចំដោយមន្ទីរវប្បធម៌និងវិចិត្រសិល្បៈខេត្តស្វាយរៀង ដើម្បីអបអរសាទរពិធីបុណ្យចូលឆ្នាំថ្មីប្រពៃណីជាតិ។

សម្តេចនិងប្រតិភូអមដំណើរបានទស្សនាស្តង់ពិព័រណ៍ផលិតផលនានា ដែលរៀបចំឡើងដោយរដ្ឋបាលខេត្ត មន្ទីរ-អង្គភាពនានា និងរដ្ឋបាលក្រុង/ស្រុកទាំង៨។ កម្មវិធីនេះរៀបចំនៅសួនច្បារមាត់ទន្លេវ៉ៃគោ (ទំនប់តាណេង ច្រាំងតាបុល) ស្ថិតនៅភូមិមេភ្លើង សង្កាត់ស្វាយរៀង។

ក្នុងឱកាសនេះ សម្តេចកិត្តិសង្គហបណ្ឌិត និងប្រតិភូអមដំណើរបានអញ្ជើញពិសារមុខម្ហូបប្រចាំខេត្តស្វាយរៀង ដូចជា សម្លរកកូកណ្តែង និងសាច់រំលីងជ្រក់សណ្តែក។

ពិព័រណ៍នេះបានបង្ហាញពីផលិតផលដ៏សម្បូរបែបរបស់ខេត្តស្វាយរៀង ដោយមានការចូលរួមពីយុវជនសសយក និងសហគមន៍មូលដ្ឋាន។

កម្មវិធីនេះជាផ្នែកមួយនៃការអបអរសាទរពិធីបុណ្យចូលឆ្នាំថ្មីប្រពៃណីជាតិ ឆ្នាំមមី អដ្ឋស័ក ព.ស.២៥៧០។