ពិធីទទួលទេវតាឆ្នាំថ្មី និងបើកព្រឹត្តិការណ៍ «នគរសង្ក្រាន្ត» យ៉ាងអធិកអធម នៅរមណីយដ្ឋានប្រវត្តិសាស្ត្រវត្តភ្នំ

រាជធានីភ្នំពេញ៖ ឯកឧត្តម ហ៊ុន ម៉ានី ឧបនាយករដ្ឋមន្ត្រី និងជាប្រធានសហភាពសហព័ន្ធយុវជនកម្ពុជា បានអញ្ជើញជាអធិបតីក្នុងពិធីទទួលទេវតាឆ្នាំថ្មី នៅរមណីយដ្ឋានប្រវត្តិសាស្ត្រវត្តភ្នំ ក្នុងព្រឹត្តិការណ៍នគរសង្ក្រាន្ត ព.ស ២៥៦៩ ឈានចូល២៥៧០។

ក្នុងពិធីប្រពៃណីជាតិខ្មែរដ៏សំខាន់នេះ ក៏មានការអញ្ជើញចូលរួមពីឯកឧត្តម ឃួង ស្រេង អភិបាលរាជធានីភ្នំពេញ និងមានប្រជាពលរដ្ឋ ភ្ញៀវជាតិ និងអន្តរជាតិចូលរួមយ៉ាងច្រើនកុះករ។

ពិធីទទួលទេវតា ជាព្រឹត្តិការណ៍មួយក្នុងពិធីបុណ្យចូលឆ្នាំប្រពៃណីជាតិខ្មែរ ដែលប្រជាពលរដ្ឋខ្មែរទូទាំងប្រទេសតែងគោរពប្រែនិបត្តិតាមជំនឿបុរាណ។ សម្រាប់ឆ្នាំមមី អដ្ឋស័ក ពុទ្ធសករាជ ២៥៧០ គឺចំថ្ងៃអង្គារ៍ ជាវេនរបស់រាជបុត្រីទី៣នៃកបិលមហាព្រហ្ម ព្រះនាម “រាក្យសាទេវី”។

ទ្រង់យាងចុះនៅថ្ងៃអង្គារ៍ ១២រោច ខែចេត្រ ត្រូវនឹងថ្ងៃទី១៤ ខែមេសា ឆ្នាំ២០២៦ វេលាម៉ោង ១០:៤៨ នាទីព្រឹក ចំថ្ងៃទី១ នៃពិធីចូលឆ្នាំប្រពៃណីជាតិខ្មែរ។

សហភាពសហព័ន្ធយុវជនកម្ពុជា បានសហការជាមួយរដ្ឋបាលរាជធានីភ្នំពេញ រៀបចំព្រឹត្តិការណ៍នគរសង្ក្រាន្ត រយៈពេល៦ថ្ងៃ ចាប់ពីថ្ងៃទី១៤ ដល់ថ្ងៃទី១៩ ខែមេសា។ កម្មវិធីនេះមានទស្សនីយភាពតាមបែបវប្បធម៌ សិល្បៈ សាសនា ប្រមាណជាង២០ទស្សនីយភាពធំៗ។

ទីតាំងសំខាន់ៗរួមមាន៖ រមណីយដ្ឋានវប្បធម៌ប្រវត្តិសាស្ត្រវត្តភ្នំ ភូមិវប្បធម៌នៅជិតផ្សាររាត្រី សួនច្បារវឌ្ឍនៈ អតីតសួនទីលានធិបតេយ្យ និងតំបន់ផ្លូវថ្មើរជើងចតុមុខ។

នៅតំបន់ផ្លូវថ្មើរជើងចតុមុខ ដែលលាតសន្ធឹងចាប់ពីមុខផ្សាររាត្រី រហូតមកដល់មុខព្រះបរមរាជវាំង គឺមានរៀបចំស្តង់តាំងបង្ហាញផលិតផលខ្មែរជាច្រើន អមដោយមានឆាកប្រគំតន្ត្រីតូចធំ ចំនួនបីកន្លែង។

ព្រឹត្តិការណ៍នេះមានគោលបំណងទាក់ទាញភ្ញៀវទេសចរជាតិ-អន្តរជាតិ និងបង្ហាញពីការដឹងគុណយ៉ាងជ្រាលជ្រៅ ផ្សារភ្ជាប់ពិធីបុណ្យចូលឆ្នាំជាមួយវីរកងកម្លាំងជួរមុខ និងបងប្អូនភៀសសឹក។

ពិធីនេះបានបង្ហាញពីស្មារតីការរួបរួមសាមគ្គី នៃមហាគ្រួសារខ្មែរតែមួយ និងការថែរក្សាការពារទំនៀមទម្លាប់ប្រពៃណី វប្បធម៌ដ៏ល្អផូរផង់របស់ជាតិ។

អត្ថបទសរសេរដោយ ចន ណារិទ្ធ
កែសម្រួលដោយ ធីតា