By ភ្នំពេញ៖ លោក ជា ធីរិទ្ធ អ្នកនាំពាក្យសម្តេចតេជោ ហ៊ុន សែន បានចេញសេចក្តីបញ្ជាក់ច្រានចោលការផ្សាយព័ត៌មានរបស់វិទ្យុបារាំងអន្តរជាតិ RFI ខ្មែរ ដែលបានអះអាងថា សម្តេចតេជោបានលុបសារមួយពីទំព័រហ្វេសប៊ុកផ្លូវការ។
ក្នុងសេចក្តីថ្លែងការណ៍នៅថ្ងៃទី១៥ ខែមេសា ឆ្នាំ២០២៦ លោកបានបញ្ជាក់ថា ខ្លឹមសារដែលវិទ្យុ RFI បានផ្សាយ គឺមិនត្រឹមត្រូវនឹងការពិតទេ ហើយអាចបណ្តាលឲ្យសាធារណជនមានការភ័ន្តច្រឡំ។ អ្នកនាំពាក្យបានលើកឡើងថា សារដែលសម្តេចតេជោបានបង្ហោះនៅថ្ងៃទី១៤ ខែមេសា ឆ្នាំ២០២៦ តាមបណ្តាញសង្គមហ្វេសប៊ុក ដើម្បីពន្យល់ដល់ប្រជាពលរដ្ឋអំពីការរៀបចំពិធីបុណ្យចូលឆ្នាំខ្មែរ មិនបានលុបចោលឡើយ ហើយនៅតែមាននៅលើទំព័រផ្លូវការដដែល។
លោក ជា ធីរិទ្ធ ក៏បានអំពាវនាវឲ្យវិទ្យុ RFI ធ្វើការកែតម្រូវព័ត៌មាននេះជាបន្ទាន់ ដើម្បីជៀសវាងការបន្តបង្កការភាន់ច្រឡំក្នុងសាធារណៈ។ ជាមួយគ្នានេះ អ្នកនាំពាក្យបានបញ្ជាក់ថា សម្តេចតេជោ ហ៊ុន សែន មិនមានទម្លាប់លុបសារដែលលោកបានបង្ហោះដើម្បីបំភ្លឺ និងពន្យល់ដល់ប្រជាពលរដ្ឋនោះទេ។
ដោយ ៖ សិលា
