By ខេត្តត្បូងឃ្មុំ – នគរបាលខេត្តត្បូងឃ្មុំបានឃាត់ខ្លួនក្រុមក្មេងទំនើងចំនួន៧នាក់ ដែលបានប្រតាយប្រតប់គ្នានៅសួនច្បារមុខសាលាខេត្ត កាលពីថ្ងៃទី១៤ មេសា ឆ្នាំ២០២៦។
លោកឧត្តមសេនីយ៍ទោ ចិន នី ស្នងការនគរបាលខេត្តត្បូងឃ្មុំ បានផ្ញើសារទៅកាន់យុវជនយុវនារីទាំងអស់ សូមអង្វរក្សកុំប្រពឹត្តអំពើមិនគប្បីដែលសង្គមស្អប់ខ្ពើម ហើយត្រូវកែខ្លួនឡើងវិញដើម្បីគ្រួសារនិងសង្គមជាតិ។
ព្រឹត្តិការណ៍នេះបានកើតឡើងនៅវេលាម៉ោង៤រសៀល នៅចំណុចសួនច្បារមុខសាលាខេត្តត្បូងឃ្មុំ ក្នុងភូមិនិគមលើ ឃុំស្រឡប់ ស្រុកត្បូងឃ្មុំ។ ការអនុវត្តនេះធ្វើឡើងតាមបទបញ្ជាយ៉ាងម៉ឺងម៉ាត់របស់នាយឧត្តមសេនីយ៍ ស ថេត អគ្គស្នងការនគរបាលជាតិ និងលោកប៉ែន កុសល្យ អភិបាលខេត្ត។
បន្ទាប់ពីទទួលបានព័ត៌មាន កម្លាំងជំនាញការិយាល័យនគរបាលព្រហ្មទណ្ឌកម្រិតស្រាលបានសហការជាមួយអធិការដ្ឋាននគរបាលស្រុកពញាក្រែក ចុះធ្វើការស្រាវជ្រាវ និងនាំខ្លួនក្រុមក្មេងទំនើងទាំង៧នាក់មកសាកសួរ។ ពួកគេបានឆ្លើយសារភាពថា ពិតជាបានប្រតាយប្រតប់គ្នានៅទីនោះមែន។
ដោយមានការចង្អុលបង្ហាញពីលោកស្នងការ សមត្ថកិច្ចបានធ្វើកិច្ចសន្យា អប់រំ និងបានឱ្យក្រុមគ្រួសារមកធានាឲ្យត្រឡប់ទៅមូលដ្ឋានវិញ។
ព្រឹត្តិការណ៍នេះបង្ហាញពីការតាមដានយ៉ាងជិតស្និទ្ធរបស់អាជ្ញាធរមានសមត្ថកិច្ច ក្នុងការទប់ស្កាត់អំពើហិង្សា និងរក្សាសន្តិសុខសង្គម។
