By ភ្នំពេញ៖ ករណីដែលត្រូវបានផ្សព្វផ្សាយយ៉ាងទូលំទូលាយតាមបណ្តាញសារព័ត៌មានមួយចំនួន អំពីស្ត្រីវ័យចំណាស់ម្នាក់ត្រូវបានកូនស្រីវាយធ្វើបាបនៅបុរីឈូកវ៉ា២ ខណ្ឌពោធិ៍សែនជ័យ បានបង្ហាញថាជាព័ត៌មានមិនពិត និងមានការភាន់ច្រឡំយ៉ាងធ្ងន់ធ្ងរ។
តាមការឲ្យដឹងពីកម្លាំងនគរបាលជំនាញនៃអធិការដ្ឋាននគរបាលខណ្ឌពោធិ៍សែនជ័យ ដែលបានចុះស្រាវជ្រាវភ្លាមៗកាលពីវេលាម៉ោង២១៖៣០នាទី យប់ថ្ងៃទី១៩ ខែមេសា ឆ្នាំ២០២៦ ដោយសហការជាមួយប៉ុស្តិ៍នគរបាលរដ្ឋបាលសំរោងក្រោម បានបញ្ជាក់ថា មិនមានករណីហិង្សាក្នុងគ្រួសារដូចការចុះផ្សាយនោះឡើយ។
បុរសជាប្តីរបស់ស្ត្រីចំណាស់បានអះអាងថា ប្រពន្ធរបស់គាត់មានបញ្ហាវង្វេងស្មារតី និងជំងឺប្រចាំកាយយូរមកហើយ។ ស្នាមរបួសនៅលើដៃ គឺបណ្តាលមកពីការរអិលធ្លាក់ពីជណ្តើរនៅផ្ទះជួល មិនមែនដោយសារការវាយធ្វើបាបពីសមាជិកគ្រួសារទេ។
ប្រភពដដែលបន្តថា បន្ទាប់ពីកូនស្រីបាននាំម្តាយមកថែទាំនៅឈូកវ៉ា២ ស្ត្រីចំណាស់បានដើរចេញពីផ្ទះដោយសារសភាពវង្វេង ហើយបានជួបអ្នកសារព័ត៌មាន។ ក្នុងស្ថានភាពស្មារតីមិនប្រក្រតី គាត់បានផ្តល់ព័ត៌មានមិនត្រឹមត្រូវ ដែលនាំឲ្យមានការផ្សាយខុសពីការពិត។
អ្វីដែលគួរឲ្យព្រួយបារម្ភ គឺបន្ទាប់ពីការផ្សាយព័ត៌មានខុសនេះ កូនស្រីបានទទួលផលប៉ះពាល់ផ្លូវចិត្តយ៉ាងខ្លាំង រហូតដល់ប៉ងធ្វើអត្តឃាតដោយលេបថ្នាំ តែសំណាងល្អ ត្រូវបានគ្រួសារជួយសង្គ្រោះទាន់ពេលវេលា និងកំពុងមានស្ថានភាពធូរស្បើយវិញ។
ករណីនេះបង្ហាញឲ្យឃើញយ៉ាងច្បាស់ថា ការផ្សព្វផ្សាយព័ត៌មានដោយខ្វះការត្រួតពិនិត្យ និងបញ្ជាក់ប្រភពឲ្យបានច្បាស់លាស់ អាចនាំឲ្យមានផលវិបាកធ្ងន់ធ្ងរទៅលើជីវិតមនុស្ស មិនត្រឹមតែប៉ះពាល់ដល់កិត្តិយសបុគ្គលនោះទេ ប៉ុន្តែថែមទាំងប៉ះពាល់ដល់សុខុមាលភាពផ្លូវចិត្ត និងសន្តិសុខសង្គមផងដែរ។
ជាមួយគ្នានេះ អាជ្ញាធរ និងគ្រួសារបានអំពាវនាវដល់សារព័ត៌មានដែលបានចុះផ្សាយព័ត៌មានមិនត្រឹមត្រូវ សូមកែសម្រួល និងបំភ្លឺឡើងវិញ ដើម្បីផ្តល់ព័ត៌មានពិតជូនសាធារណជន និងជៀសវាងការភាន់ច្រឡំបន្ថែមទៀត។
