By ភ្នំពេញ – លោក ដុង ជុន (Dong Jun) រដ្ឋមន្ត្រីក្រសួងការពារជាតិចិន ដែលជានាយឧត្តមនាវីដំបូងគេបង្អស់ក្នុងប្រវត្តិសាស្ត្រដែលត្រូវបានតែងតាំងជារដ្ឋមន្ត្រីការពារជាតិ នឹងធ្វើដំណើរទស្សនកិច្ចផ្លូវការមកកម្ពុជានៅថ្ងៃទី២២ ខែមេសា ឆ្នាំ២០២៦។
ដំណើរទស្សនកិច្ចនេះមានសារៈសំខាន់យ៉ាងខ្លាំង ព្រោះវានឹងធ្វើឡើងជាមួយនឹងកិច្ចសន្ទនាយុទ្ធសាស្ត្រ២+២ (ក្រសួងការបរទេស និងក្រសួងការពារជាតិ) ជាលើកដំបូងបំផុតរវាងកម្ពុជា និងចិន។ លោក ដុង ជុន នឹងអមដំណើរដោយរដ្ឋមន្ត្រីការបរទេសចិនលោក វ៉ាង យី។
លោក ដុង ជុន ដែលមានបទពិសោធន៍ជាង៤០ឆ្នាំក្នុងកងទ័ពជើងទឹកចិន ត្រូវបានគេស្គាល់ថាជា “អ្នកចរចាដ៏ឆ្លាតវៃ” ដែលមានសមត្ថភាពបន្ធូរបន្ថយភាពតានតឹងនៅតំបន់សមុទ្រចិនខាងត្បូង។ ការតែងតាំងរបស់លោកជារដ្ឋមន្ត្រីការពារជាតិនៅឆ្នាំ២០២៣ បង្ហាញពីការផ្លាស់ប្តូរយុទ្ធសាស្ត្ររបស់ចិនក្នុងការផ្តល់តម្លៃលើសន្តិសុខផ្លូវទឹក។
លោក ដុង ជុន មានទំនាក់ទំនងពិសេសជាមួយកម្ពុជា ដោយលោកត្រូវបានគេស្គាល់ថាជា “អ្នកសម្របសម្រួលសន្តិភាព” ដែលមានតួនាទីសំខាន់ក្នុងការគាំទ្រកិច្ចព្រមព្រៀងឈប់បាញ់នៅតាមព្រំដែនកម្ពុជា-ថៃ។ លោកតែងតែប្រើពាក្យ “មិត្តដែកថែប” ដើម្បីបញ្ជាក់ពីជំហររបស់ចិនក្នុងការការពារអធិបតេយ្យភាពកម្ពុជា។
ដំណើរទស្សនកិច្ចនេះគឺជាសញ្ញាណយ៉ាងច្បាស់លាស់នៃការពង្រឹងទំនាក់ទំនងយោធារវាងកម្ពុជា និងចិន ដែលបង្ហាញថាទំនាក់ទំនងការពារជាតិរវាងភ្នំពេញ និងប៉េកាំង បានឈានដល់កម្រិតកំពូលថ្មីមួយទៀត។
