អាជ្ញាធរចុះបង្ក្រាបបទល្មើសអនឡាញ និងគ្រឿងញៀន ឃាត់ខ្លួនជនបរទេស ៥៥នាក់នៅភ្នំពេញ

ភ្នំពេញ៖ កម្លាំងសមត្ថកិច្ចរបស់គណៈបញ្ជាការឯកភាពរាជធានីភ្នំពេញ បានធ្វើប្រតិបត្តិការចុះបង្ក្រាបបទល្មើសឆបោកតាមប្រព័ន្ធបច្ចេកវិទ្យា (Online Scam) និងគ្រឿងញៀន នៅអគារខុនដូរ ZHUOYUFENG ក្នុងខណ្ឌមានជ័យ ដោយឃាត់ខ្លួនជនបរទេសចំនួន ៥៥នាក់។

ប្រតិបត្តិការនេះបានធ្វើឡើងនៅថ្ងៃទី២១ មេសា ២០២៦ វេលាម៉ោង ១១:០០នាទី ក្រោមការដឹកនាំផ្ទាល់ពីលោក ឃួង ស្រេង អភិបាលរាជធានីភ្នំពេញ និងឧត្តមសេនីយ៍ឯក ជួន ណារិន្ទ អគ្គស្នងការរងនគរបាលរាជធានីភ្នំពេញ។

យោងតាមរបាយការណ៍ ក្រុមការងារចម្រុះបានរកឃើញជនបរទេសស្នាក់នៅខុសច្បាប់ចំនួន ៤៤នាក់ និងជនបរទេសប្រព្រឹត្តបទល្មើស Online Scam ចំនួន ១១នាក់ ដែលក្នុងនោះមានជនជាតិវៀតណាម ១១នាក់ (ស្រី ៣នាក់)។

វត្ថុតាងដែលបានចាប់យករួមមាន៖ កុំព្យូទ័រយួរដៃ ១៤គ្រឿង ទូរស័ព្ទដៃ ៦គ្រឿង និងគ្រឿងញៀនចម្រុះទម្ងន់សរុបប្រហែល ១០គីឡូក្រាម។

បទល្មើសនេះធ្វើឡើងក្រោមរូបភាពអូសទាញឱ្យជនរងគ្រោះដាក់ប្រាក់ដើម្បីទទួលបានប្រាក់ចំណេញ។ បច្ចុប្បន្ន ជនល្មើសទាំងអស់និងវត្ថុតាងត្រូវបានបញ្ជូនទៅស្នងការដ្ឋាននគរបាលរាជធានីភ្នំពេញ ដើម្បីបន្តនីតិវិធីតាមច្បាប់។

ប្រតិបត្តិការនេះបានធ្វើឡើងនៅអគារលេខ៥២៤ ផ្លូវបេតុង ភូមិដំណាក់ធំ៥ សង្កាត់ស្ទឹងមានជ័យទី៣ ខណ្ឌមានជ័យ រាជធានីភ្នំពេញ។

អាជ្ញាធរបានអះអាងថា ប្រតិបត្តិការនេះជាផ្នែកមួយនៃការខិតខំប្រឹងប្រែងបង្ក្រាបបទល្មើសឆបោកតាមប្រព័ន្ធអនឡាញ ដែលកំពុងកើនឡើងនៅក្នុងប្រទេសកម្ពុជា។