By ទីក្រុងមូស្គូ៖ លោក Sergey Lavrov រដ្ឋមន្ត្រីការបរទេសរុស្ស៊ី បានចោទប្រកាន់បណ្តាប្រទេសលោកខាងលិចថា បានប្រកាសសង្គ្រាមប្រឆាំងនឹងរុស្ស៊ី ដោយប្រើប្រាស់អ៊ុយក្រែនជាកងទ័ពជួរមុខ។
ក្នុងជំនួបជាមួយតំណាងអង្គការ NGOs រុស្ស៊ី កាលពីថ្ងៃទី២៤ ខែមេសា លោក Lavrov បានថ្លែងថា «សង្គ្រាមបើកចំហមួយត្រូវបានប្រកាសដាក់មកលើយើង ដោយរបបកៀវត្រូវបានគេប្រើជាមុខព្រួញ»។
លោកបានបន្ថែមថា អ៊ុយក្រែនមិនអាចធ្វើអ្វីបានឡើយ បើគ្មានអាវុធ ចារកម្ម និងការបណ្តុះបណ្តាលពីបស្ចិមលោក។ លោកក៏បានរិះគន់មន្ត្រីយោធាប៊ែលហ្សិកដែលសារភាពថា កំពុងត្រៀមធ្វើសង្គ្រាមជាមួយរុស្ស៊ី ដោយអ៊ុយក្រែនជួយទិញពេលវេលា។
រដ្ឋមន្ត្រីក្រសួងការបរទេសរុស្ស៊ីរូបនេះ បានគូសបញ្ជាក់ថា លោកខាងលិច ជាពិសេសទីក្រុងព្រុចសែល កំពុងធ្វើអ្វីៗគ្រប់យ៉ាងដើម្បីបង្ខូចកេរ្តិ៍ឈ្មោះរុស្ស៊ី និងត្រៀមសង្គ្រាមនាពេលខាងមុខ។
